Shqipëria do të hapë ambasadë në Bosnje. Vendimin e njoftoi Edi Rama ditën e sotme gjatë vizitës që zhvilloi në Sarajevë. Gjatë konferencës me Kryetaren e Këshillit të Ministrave të Republikës së Bosnje dhe Hercegovinës, Borjana Krišto, Edi Rama u shpreh se qëllimi i këtij turi është ndërtimi i një qëndrimi të përbashkët për Procesin e Berlinit.
“Ne jemi të interesuar që marrëveshja për lëvizjen e lirë me kartë identiteti për qytetarët shqiptarë të Kosovës të mundësohet sepse është pakuptim që të kemi probleme të këtyre niveleve. Sikur vetë Serbia i ka firmosur ato marrëveshje besoj që edhe Bosnja do ta bëjë këtë gjë”tha ai.
Kishte një thirrje direkte për BE-në për më shumë fonde. “Erdha për ta informuar kryeministren për atë që duam të bëjmë për Samitin e Procesit të Berlinit në Tiranë dhe duam të ndërtojmë një qëndrim të përbashkët të gjashtë shteteve për ta shfrytëzuar samitin ku të marrë jetë edhe plani i një financimi të ri dhe mbështetje të re të BE-së për këto gjashtë vende. Ne e mbështesim mbështetjen e BE-së për Ukrainën, por është e domosdoshme që në raport me Ballkanin Perëndimor të ndërtohet një qasje e re.
Nuk besoj që ne duhet të fillojmë ndonjë luftë për të marrë më shumë mbështetje. BE duhet të na mbështesë edhe më shumë duke dhënë edhe një provë tjetër që sjellja e mirë shpërblehet. Se vullneti për të ndërtuar paqen shpërblehet” tha ai.
