MALIQ- Kryeministri Edi Rama po prezanton projektin e emërtuar ‘Nur’ me delegacionin nga Azerbajxhani për gazfikimin e Korçës. Rama tha se ky projekt po monitorohet nga vetë presidenti i Azerbajxhanit dhe është një shenjë kuptimplotë e një miqësie të posaçme.
Rama tha se emërtimi i projektit u zgjedh nga presidenti i Azerbajxhanit dhe shtoi se ka qenë dëshmitar kur presidenti i kishte thënë ministrit për këtë projekt se nuk duam fitime por e rëndësishme është të mos humbasim dhe të fitojmë qytetarët e atij vendi mik.
PJESË NGA FJALIMI:
“Është e vërtetë një shenjë kuptimplotë e një miqësie të posaçme, pasi kjo kompani ka kaq shumë projekte dhe kërkohet kudo. Gjetja e kohës dhe mundësia për të ardhur deri në Korçë me drejtuesin e kompanisë, që na bëri një shpjegim shterues dhe gjithashtu të tjerët, është një gjest kuptimplotë i një miqësie dhe partneriteti strategjik me një vend shumë mik.
Nga ana tjetër dua të jap një detaj shumë të rëndësishëm për mua, ky emërtim i bukur “Nur” është zgjedhur posaçërisht nga presidenti i Azerbajxhanit, dhe është ai që kujdeset posaçërisht për këtë projekt. Kam qenë dëshmitar kur i ka thënë ministrit nga për projektin në Shqipëri; Nuk duam futime, e rëndësishme është të mos humbasim dhe të fitojmë qytetarët e atij vendi mik,” tha Rama.
