Kryeministri Edi Rama ka zhvilluar një takim me mësuesit në gjimnazin “Besnik Sykja” në Tiranë, ku u ndal te plani për arsimin dhe te pagat.
Rama theksoi se në vitin e ardhshëm synohet se paga mesatare e mësuesve do të shkojë deri në 1250 euro. Ai nënvizoi se kjo mund të realizohet dhe do të përmirësohen edhe kushtet e shkollës.
Kryeministri u shpreh se beson në faktin se Shqipëria nuk ka shkolla si në Europë, por sipas tij i ka shkollat janë të mira si atje.
“Qëllimi, ambicia jonë dhe plani, jo ambicia, por plani ynë është që në vitet e ardhshme brenda kësaj dekade, ne pagën mesatare të mësuesve do ta çojmë në 1250 euro. Është e bëshme, është plotësisht e bëshme, nuk besoj se do të kemi problem me këtë, ndërkohë që siç foli kryetarja në detyrë e bashkisë, siç foli ministrja, pjesa tjetër e përmirësimit të vazhdueshëm të kushteve në shkolla prapë është diçka që shkon në favor të rritjes së dëshirës për të shkuar në punë dhe për të për të punuar.
Se tjetër është thjesht një shkollë ku s’ka kushte, isha përpara pak ditësh në një kantier në Shkodër, në mes Shkodrës, shkolla “Ndre Mjeda”, një shkollë me goxha në fakt rezultate të mira, edhe me rezultate të mira nxënësit nëpër konkurse dhe nuk i besoja dot syve.
As syve, as hundës që më sillte atë aromën e shkollave që dikur vinin vetëm era lagështi, ngrohje as harroje në një tmerr, një tmerr. Një shkollë që nuk kishte vënë dorë, besoj që ditën që ishte ndërtuar, kushedi se kur. Ka akoma realitete të tilla, por nga ana tjetër, në Tiranë, unë besoj që ne mund të jemi shumë krenarë për faktin se nuk kemi shkolla si në Europë, po kemi shkolla si shkollat më të mira në Europë”, tha Rama.
