Qeveria njofton se ka miratuar në mbledhjen e sotme të Këshillit të Ministrave rritjen me 15% të pagave për pedagogët. Lajmi u bë i ditur nga ministrja e Arsimit Evis Kushi, e cila tha se 7% të rritjes do ta mbulojë buxheti i shtetit dhe 8% nga vetë Universiteti.
Vendimi i sotëm vjen në më pak se dy orë nga përfundimi i protestës së stafeve akademike, të cilat janë mbledhur në korpusin e Universitetit Politeknik. Ata kërkuan rritje të pagave, ose në të kundërt paralajmëruan bojkot të leksioneve.
“Është një vendim që ne kemi vendosur që pagat e pedagogët të rriten deri në 15%, 7% do të paguhet nga shteti ndërsa pjesa tjetër do të paguhet nga Universitetet. Këto rritje do ta mbulojnë me të ardhurat e tyre. Është një rritje që rrit performancën e tyre.
Tani jemi duke diskutuar për buxhetin 2023 dhe mbështetja do të jetë më e madhe, shpesh më bëjnë pyetjen, për policët etj. Pedagogët, të cilët kam nderin t’i përkas të ardhurat i sigurojnë në mënyra të tjera, edhe nga programet e kërkimit të BE.
Në maj, ne kemi nënshkruar me BE marrëveshjen që i jep një kuotë universiteteve shqiptare.. Të ardhurat nuk do të jenë vetëm të pagës por do të jenë të tjera. Kufirin do ta rrisim në vijimësi duke respektuar kufirin e Ligjit të Arsimit të Lartë”, u shpreh Evis Kushi.
