Partia Demokratike e Shqipërisë ka përgëzuar Parlamentin e Maqedonisë së Veriut pas pranimit të propozimit francez. Në një reagim, kreu i partisë Sali Berisha e cilësoi votimin e sotëm në shtetin fqinj një vendim të guximshëm dhe historik.
Ish-kryeministri kujton se hapja e negociatave më Shqipërinë kanë qenë të bllokuara prej gjashtë vitesh për shkak, siç shprehet ai, të mosplotësimit të kushteve nga qeveria Rama në vitet e fundit, përpos vetos bullgare. Këtë hap të radhës të marrë nga shteti fqinj, PD e sheh si një zhvillim të lidhur edhe me dëshirën e BE për t’u garantuar vendeve të rajonit perspektivën evropiane.
Berisha zotohet po ashtu se kur PD të jetë në pushtet do të miratojë çdo ligj e akt të kërkuar nga BE për negociatat.
DEKLARATË E PARTISË DEMOKRATIKE TË SHQIPËRISË
Partia Demokratike e Shqipërisë përgëzon Parlamentin e Maqedonë së Veriut dhe përshëndet vendimin e guximshëm dhe historik që mori sot, me të cilin zhbllokoi hapjen e negociatave me BE për të dy vendet tona.
Lidhur me votimin e propozimit francez në Parlamentin e Maqedonisë së Veriut!
Të dashur miq, Parlamenti i Maqedonisë së Veriut miratoi propozimin e Francës që i hap rrugën çeljes se negociatave të Shqipërisë dhe Maqedonisë së Veriut me Bashkimin Europian.
Me këtë rast Partia Demokratike e Shqipërisë përgëzon Parlamentin e vendit fqinj, dhe përshëndet vendimin e guximshëm dhe historik që mori sot, me të cilin zhbllokoi hapjen e negociatave me BE për të dy vendet tona.
Hapjen e negociatave për Shqipërinë me BE, të bllokuara prej 6 vitesh, dhe pasi ato u shtynë 5 herë, për shkak të mosplotësimit të kushteve nga qeveria Rama, dhe vitin e fundit për shkak të bllokimit nga Bullgaria të Maqedonisë së Veriut për zgjedhjen e kundërshtive midis këtyre vendeve, Partia Demokratike e konsideron si një zhvillim të lidhur kryesisht me dëshirën fisnike të BE dhe vendeve anëtare për të garantuar perspektivën europiane të vendeve të Ballkanit Perendimor, pavarësisht se, siç sanksionon rezoluta e Parlamentit Europian, Shqipëria ka probleme të mëdha me standardet, kushtet dhe kriteret e BE.
Me këtë rast PD garanton shqiptarët dhe BE, Komisionin Europian dhe vendet anëtare të BE, se do mbështesë, dhe, nesër në pushtet, do të marrë e miratojë çdo ligj, akt e vendim për plotësimin, kapitull për kapitull, e kërkesave të negociatave me BE, dhe për të bërë realitet anëtarësimin e Shqipërisë në BE, si të ardhmen më të shkëlqyer për Shqipërinë dhe shqiptarët. sb
Ndërkohë, kujtojmë se në reagimin e tij, kreu i qeverisë Edi Rama, e drejtoi gishtin edhe nga ata që cilësoi persona “grata e non grata” që sipas tij, kanë bërë çmos që vendi të mbeste pas në rrugën e integrimit në BE.
