Shoqata Mjekësore Britanike (BMA) ka konfirmuar se mjekët rezidentë në Angli do të hyjnë në grevë nga 17 deri më 22 dhjetor, duke krijuar shqetësime për shërbimin shëndetësor në prag të Krishtlindjes. Kjo masë vjen pas një greve pesë-ditore muajin e kaluar dhe si reagim ndaj “dështimit të vazhdueshëm të qeverisë për të bërë një ofertë të besueshme për paga dhe vende pune”.
Dr. Jack Fletcher, kreu i Komitetit të Mjekëve Rezidentë të BMA-së, tha se nuk kanë opsione të tjera përveç njoftimit të datave të reja për greva. Ai theksoi se grevat mund të shmangen nëse qeveria ofron rritje graduale të pagave dhe zgjidhje të qëndrueshme për sigurinë e vendeve të punës për mjekët, duke ruajtur kështu fuqinë punëtore afatgjatë dhe duke lehtësuar pritjet e pacientëve për vizita.
Dr. Fletcher po ashtu përmendi përshkallëzimin e krizës në tregun e punës, duke theksuar se mjekët duhet të tregojnë përvojë më të madhe se më parë për të fituar pozita trajnimi, një faktor që po i shtyn ata drejt grevave. Grevat e mëparshme kanë ndodhur nga 25 deri më 30 korrik dhe më pas nga 14 deri më 19 nëntor, me grevën e fundit që e bëri të 13-tën që nga marsi 2023. Kjo e fundit u vlerësua se i ka kushtuar shërbimit shëndetësor rreth 300 milionë paund.
BMA gjithashtu njoftoi se do të votojë për zgjatjen e mandatit për grevë, i cili aktualisht skadon në janar. Nëse anëtarët votojnë për zgjedhjen e mandatit, ai mund të zgjasë deri në gusht të vitit të ardhshëm. Votimi do të zhvillohet nga 8 dhjetori deri më 2 shkurt, duke shtuar një tjetër dimension tensioni në marrëdhëniet mes mjekëve dhe qeverisë.
