Departamenti Amerikan i Shtetit (DASH) ka publikuar raportin për vitin 2024 mbi të drejtat e njeriut, duke përfshirë Shqipërinë. Në këtë raport, evidentohet se situata e të drejtave të njeriut në Shqipëri nuk ka pësuar ndryshime të konsiderueshme gjatë vitit. Qeveria ka ndërmarrë hapa për të identifikuar dhe ndëshkuar zyrtarët që shkelin të drejtat e njeriut, megjithatë disa probleme vazhdojnë të jenë prezent.
Një nga shqetësimet kryesore përmendet në lidhje me arrestimet dhe paraburgimin, të cilat shpesh zgjaten pa akuza. Avokati i Popullit, Komiteti Shqiptar i Helsinkit dhe Instituti për Aktivizëm dhe Ndryshim Social kanë evidentuar se periudha e gjatë e paraburgimit është një fenomen i vazhdueshëm. Ligji shqiptare kërkon që shumica e hetimeve paraprake të përfundojnë brenda tre muajsh, por prokurorët kanë të drejtë të zgjasin këtë periudhë, dhe paraburgimi nuk duhet të kalojë tre vjet. Megjithatë, raportohet se mungesa e gjyqtarëve dhe prokurorëve ka vonuar procedurat e drejtësisë. Probleme të tjera si burimet e kufizuara, mungesa e hapësirës dhe stafi i pamjaftueshëm kanë ndikuar negativisht në shpejtësinë e proceseve gjyqësore.
Sa i përket mbrojtjes së refugjatëve, raporti thekson se qeveria ka bashkëpunuar me Zyrën e Komisionerit të Lartë të OKB-së për Refugjatët (UNHCR) dhe organizata të tjera humanitare për të ofruar mbrojtje dhe ndihmë për refugjatët dhe azilkërkuesit. UNHCR ka monitoruar intervistat personale me azilkërkuesit gjatë procesit të përcaktimit të statusit të refugjatit dhe ka ofruar mbështetje për integrimin e tyre.
Raporti përfundon duke evidentuar nevojën për përmirësime të vazhdueshme në sistemin e drejtësisë dhe mbrojtjen e të drejtave të njeriut. Dështimi në zgjidhjen e problemeve të theksuara mund të minojë besimin në institucione dhe të ndikojë negativisht në situatën e të drejtave të njeriut në vend.
