Projektbuxheti për vitin 2026 është ndërtuar si ligji më i rëndësishëm ekonomik për Shqipërinë, duke u konsideruar si buxheti më i madh në historinë e vendit, me një vlerë prej 9 miliardë eurosh, e cila është rreth 1 miliard euro më shumë se në 2025. Performanca e mirë e të ardhurave gjatë vitit aktual ka ndikuar në përcaktimin e këtij buxheti më të madh.
Ministria e Shëndetësisë dhe Mbrojtjes Sociale pritet të marrë pjesën më të madhe të financimeve, duke përfshirë pagesat për papunësi, invaliditet dhe ndihmë ekonomike. Ndërsa Ministria e Infrastrukturës dhe Energjisë do të marrë më shumë fonde për të përfunduar projektet e vjetra dhe për të filluar ato të reja në 2026. Po ashtu, Ministria e Mbrojtjes do të ketë një rritje të financimeve për të përmbushur obligimin e saj për të shpenzuar rreth 5% të Prodhimit të Brendshëm Bruto për mbrojtjen.
Institucione të tjera, si Ministria e Bujqësisë dhe disa institucione të drejtësisë, do të mbulohen për shpenzime shtesë nga buxheti i shtetit për shkak të ndërprerjes së financimeve të huaj. Edhe 61 njësitë e pushtetit vendor pritet të përfitojnë më shumë fonde, me transfertat që do të kalojnë vlerën e 40 miliardë lekëve për vitin e ardhshëm.
Rikthimi i paketës fiskale do të sjellë ndryshime ligjore, përfshirë rimbursimin e TVSH-së prej 10% për fermerët dhe një ndryshim në tatimin mbi turizmin, si dhe reduktimin e tatimit të pasurive të paluajtshme nga 15% në 5%. Gjithashtu do të preken akcizat për cigaren dhe pijet alkoolike.
Pas miratimit te Këshillit të Ministrave, ky projektbuxhet do të diskutohet në konferencën e kryetarëve dhe më pas do të depozitohet në Kuvend. Ai do të kalojë në komisionet parlamentare, me socialistët që parashikojnë diskutimin në parim në mes të nëntorit dhe votimin nen për nen më 11 dhjetor.
