Këshilli i Ministrave miratoi sot një seri vendimesh të rëndësishme, ndër të cilat përfshihet ndryshimi i ligjit për mbrojtjen e prokurorëve dhe gjykatësve të institucioneve të veçanta si SPAK, GJKKO dhe BKH. Sipas vendimit të ri, kreu i SPAK, Altin Dumani, si dhe çdo drejtues tjetër i këtij institucioni, do të gëzojë mbrojtje personale me mjete nga trupat e sigurisë për një periudhë prej tre vjetësh pas përfundimit të mandatit të tij.
Për kreun e GJKKO, Erjon Bani, dhe drejtuesen e BKH, Aida Hajnaj, mbrojtja do të jetë e garantuar për dy vjet pas lirimit nga detyra. Sipas formulimit të ri, mbrojtja ofrohet përkatësisht me truprojë të nivelit bazë dhe truprojë të nivelit të mesëm gjatë gjithë kohëzgjatjes së mandatit, si dhe për periudhën pas këtij mandati, që ndryshe nga ligji i mëparshëm, për drejtuesin e Prokurorisë së Posaçme zgjat deri në tre vjet.
Ligji i mëparshëm garantonte mbrojtjen personale për kryetarët e gjykatave dhe drejtuesit e institucioneve të hetimit vetëm gjatë mandatit dhe për një periudhë maksimumi dy vjet pas tij. Ndryshimi i sapomiratuar ka si qëllim të forcojë sigurinë e atyre që punojnë në luftën kundër korrupsionit dhe krimit të organizuar, duke ofruar një periudhë më të gjata mbrojtjeje për ata që përballen me rrezikshmëri të lartë.
Ky hulumtim dhe rishikim i politikave për mbrojtjen e prokurorëve dhe gjykatësve që operojnë në fushat delikate të drejtësisë paralajmëron një përkushtim më të madh të shtetit për t’i mbrojtur ata në përmbushjen e detyrave të tyre.
Shtimi i kohëzgjatjes së mbrojtjes për drejtuesit e Prokurorisë së Posaçme paraqet një hap të rëndësishëm në drejtimin e duhur për sigurinë e individëve, që kanë përgjegjësi të mëdha në procesin e hetimeve dhe ndjekjes penale në Shqipëri.
