Vendimi i qeverisë për të bllokuar platformën TikTok në shqipëri, duket se vetëm e ka shtuar dëshirën e qytetarëve për të shpenzuar kohë në të.
Sipas ekspertëve të IT-së, vetëm gjatë pesë ditëve të fundit numri i përdoruesve u trefishua.
Dëshira për të pasur këtë rrjet social ka përfshirë edhe ata që nuk e kishin më parë një të tillë, dhe kjo bëhet duke shkarkuar aplikacionin falas VPN.
Eksperti i IT, Tomi Kallaxha thotë për TCh: “Duke qenë se është folur kaq shumë për këto VPN dhe njerëzit i ka kapur dëshira për të aksesuar TikTok-un, që është bllokuar nga kompanitë telefonike, dhe në top dhjetë aplikacionet më të shkarkuara, gjashtë prej tyre janë VPN. Ndërsa në vendin e dhjetë është TikTok-u. Përderisa është në listën e top njëzetëshes, numri i përdoruesve vetëm në muajin mars është rritur me 60-80 mijë.”
Por telefoni nuk përdoret vetëm për qëndruar në TikTok. Shqiptarët kanë shfaqur interes edhe për edukimin, sportin, bastet e palejuara dhe filmat serialë.
“Një fjalë kyçe shumë specifike që është tepër interesante është se vajzat po kërkojnë profesionet më të mira në teknologji informacioni. Kemi dhe shkarkim të madh të serialit ‘Adoleshenca’, dhe në fund, shqiptarët janë të pushtuar nga futbolli dhe bastet online”, shton Kallaxha.
Thirrjet për rrezikim të të dhënave personale nëpërmjet përdorimit të VPN-ve kanë rënë në vesh të shurdhër, pasi shqiptarët në TikTok po vijojnë të shtohen.
