Qeveria britanike ka lançuar një faqe interneti të quajtur “Prepare”, e cila ka si qëllim të ndihmojë familjet të përgatiten për situata emergjente, duke ofruar këshilla se si të menaxhojnë krizën, qoftë ajo një luftë, ndëprerje energjie, mot ekstrem apo kriza të tjera kombëtare.
Faqja “Prepare” paraqet një listë me nëntë artikuj thelbësorë që çdo familje duhet të ketë në shtëpi për të qenë të përgatitur. Mes këtyre, përfshihet një fener me bateri ose të karikueshëm manual, pasi janë më të sigurta se qirinjtë, si dhe një bankë energjie portative për të karikuar telefonin. Një radio me bateri është e domosdoshme për të marrë informacion në rast se energjia elektrike ndërpritet, dhe për këtë arsye një radio auto gjithashtu mund të përdoret, me rekomandimin për të qëndruar brenda në kushtet më ekstreme.
Lista vazhdon me bateri rezervë për fenerë dhe pajisjet mjekësore, një kuti ndihme që përmban nevojat më të rëndësishme mjekësore si fashat dhe antiseptikët, si dhe dezinfektues për duar në rast se uji nuk është i disponueshëm. Uji i ambalazhuar është thelbësor, me qeverinë që thekson se sasia e nevojshme ndryshon në varësi të situatës. Organizata Botërore e Shëndetësisë rekomandon të paktën 2.5-3 litra ujë për person në ditë.
Po ashtu, kërkohen ushqime që zgjasin, në mënyrë që të mund të konsumohen pa pasur nevojë për gatim, si konservat dhe frutat e thata. Nëse ka foshnja në familje, furnizimet e duhura si pelena dhe qumësht pluhur janë gjithashtu të rëndësishme.
Faqja “Prepare” sugjeron që blerja e furnizimeve të bëhet gradualisht, për të ndihmuar familjet që të krijojnë një paketë emergjence me kalimin e kohës. Me një theks të veçantë mbi rëndësinë e përgatitjes, faqja vëren se emergjencat ndodhin çdo ditë, dhe mund të shkaktohen nga faktorë të ndryshëm që prekin të gjithë shoqërinë.
