Sekretari i Përgjithshëm i OKB-së, Antonio Guterres, shprehu shqetësime të thella për situatën në Gaza, duke theksuar se nuk duhet të frikësohemi nga kërcënimet e qeverisë izraelite lidhur me njohjen e një shteti palestinez. Në një konferencë për media, Guterres theksoi se veprimet e Izraelit, përfshirë “shkatërrimin e plotë të Gazës” dhe aneksimin e Bregut Perëndimor, do të vazhdojnë pavarësisht reagimeve ndërkombëtare.
Kjo deklaratë vjen në kontekstin e një sesioni të planifikuar në OKB, ku Franca dhe disa vende të tjera do të paraqesin një propozim për njohjen e shtetit të Palestinës. Zyrtarët izraelitë kanë kërcënuar me hakmarrje diplomatike ndaj çdo vendi që mbështet këtë njohje, përfshirë një vazhdim të aneksimit të territorit palestinez. Guterres e kritikoi këto veprime, duke i quajtur ato si një “pretekst” për politikën e Izraelit, e cila, sipas tij, refuzon të lejojë palestinezët të kenë një shtet të pavarur.
Ai tregoi se është thelbësore që Izraeli të ndihet i izoluar në arenën ndërkombëtare, si një mënyrë për ta nxitur të ndryshojë qasjen e tij ndaj palestinezëve. Guterres u shpreh se perspektiva e njohjeve të reja për Palestinën ka një simbolikë të rëndësishme për popullin palestinez, duke theksuar se alternativat si një zgjidhje e një shteti, ku miliona palestinezë do të mbesin të diskriminuar dhe pa të drejta, janë të papranueshme në shekullin e 21-të.
Guterres gjithashtu bëri thirrje për një armëpushim në Rripin e Gazës dhe përshkroi gjendjen në të si një nga më të tmerrshmet që ka parë ndonjëherë, duke shprehur se vdekjet dhe shkatërrimi janë në nivele alarmante. Ai theksoi se situata është e papranueshme nga një pikëpamje morale, politike dhe ligjore, duke shmangur megjithatë përdorimin e termit “gjenocid” për shkak të mungesës së një vendimi të drejtësisë ndërkombëtare.
