Prej kësaj të diele, shqiptarët që udhëtojnë drejt vendeve të Bashkimit Evropian do të përballen me një procedurë të re regjistrimi në sistemin e quajtur entry-exit (EES). Ky sistem zëvendëson vulën tradicionale në pasaportë me një regjistrim biometrik, ku do të mblidhen të dhënat për fytyrën dhe shenjat e gishtave të çdo udhëtari.
Entry-exit do të menaxhohet nga Policia e Kufirit dhe synon të rrisë sigurinë, duke monitoruar udhëtimet afatshkurtra, që përfshijnë qëndrime deri në 90 ditë brenda një periudhe prej 180 ditësh. Po ashtu, ky sistem ka si qëllim të parandalojë imigracionin e paligjshëm. Të dhënat do të ruhen në një bazë të centralizuar, eu-LISA, me seli në Estoni, e cila do të mbledhë informacion nga 25 vende të zonës Schengen dhe katër shtete të lidhura, përfshirë Islandën dhe Zvicrën.
Regjistrimi në këtë sistem bëhet vetëm një herë dhe informacioni do të shërbejë për çdo kalim në një vend të Bashkimit Evropian. Në rast se një udhëtar kalon në disa vende brenda të njëjtit udhëtim, regjistrimi do të realizohet vetëm në vendin e parë të hyrjes. Megjithatë, pikat kufitare të Shqipërisë do të mbeten të pandryshuara, pasi ndryshimi zbatohet vetëm në portat hyrëse të BE-së.
Kjo ndërlikim i ri në procedurat e udhëtimit është pjesë e përpjekjeve të BE-së për të menaxhuar fluksin e udhëtarëve dhe për të rritur kontrollin mbi kalimet e kufijve, në një kohë kur siguria dhe imigracioni mbeten temë të nxehta për shumë vende evropiane.
