SHBA- Departamenti Amerikan i Shtetit ka vendosur të pushojë nga puna më shumë se 1,300 punonjës. Sipas një zyrtari të lartë të Departamentit të Shtetit të cituar nga Associated Press, i cili foli në kushte anonimiteti, njoftimet për shkarkim tashmë po u dërgohen 1,107 punonjësve civilë dhe 246 diplomatëve që shërbejnë në pozicione brenda SHBA-së.
Ndërkohë që në një video të publikuar nga Reuters, shihet dhe ish-diplomatja amerikane në Shqipëri Yuri Kim. Kim, e veshur me xhaketë të verdhë, shihet teksa po përshëndet punonjësit e larguar nga puna. Duke duartrokitur, Kim e rrethuar nga punonjës të tjerë të DASH, kanë nderuar kolegët e tyre tashmë të hequr nga puna.
Vendimi është përshëndetur nga Presidenti Donald Trump, Sekretari i Shtetit Marco Rubio dhe republikanët e lartë si një veprim i domosdoshëm dhe që do ta bëjë diplomacinë amerikane më të shkathët dhe efektive. Megjithatë, ky veprim ka tërhequr kritika të ashpra nga ish-diplomatë dhe diplomatë aktualë, të cilët paralajmërojnë se reduktimi dramatik i personelit do të dobësojë aftësinë e SHBA-së për tu përballur me kërcënimet ekzistuese dhe ato në zhvillim në të gjithë botën.
