ELBASAN- Një aksident i rëndë në vendin e punës ka ndodhur në Uzinën e Ferrokromit (Albchrome) në Elbasan, ku një punëtor i identifikuar si Rudin Meçja ka mbetur i plagosur dhe mësohet se ndodhet në gjendje kritike për jetën. Bëhet me dije se ngjarja ka ndodhur gjatë turnit të parë të punës Meçja është goditur nga një pllakë metalike me peshë disa qindra kilogramë, e cila i ka rënë mbi trup.
Mësohet se ai ka pësuar politraumë me dëmtime të rënda të organeve të brendshme dhe për shkak të gjendjes së tij kritike, Mecja është transportuar menjëherë drejt Spitalit të Traumës në Tiranë, ku po merr ndihmë të specializuar. Një muaj më parë kompania që administron Uzinën e Ferrokromit në Elbasan u gjobit me 8 milionë lekë, pasi rezultoi se nuk respektonte rregullat e sigurisë gjatë procesit të punës.
Ndërkohë, pas plagosjes së punonjësit, Inspektorati i Punës vendos pezullimin e pjesshëm të aktivitetit të Albchrome për sigurinë dhe shëndetin në punë. Aktiviteti i repartit ku ndodhi aksidenti pezullohet deri në marrjen e masave për sigurinë e punëtorëve. Nga ana tjetër, Policia dhe autoritetet përkatëse kanë nisur hetimet për zbardhjen e plotë të rrethanave të ngjarjes dhe për verifikimin e kushteve të sigurisë në uzinë.
