Johnson & Johnson është urdhëruar të paguajë 1.56 miliardë dollarë një gruaje nga Merilendi, e cila e akuzoi kompaninë se pudra e saj për foshnje shkaktoi kancer të lidhur me azbestin. Ky dëmshpërblim shënon shifrën më të lartë të dhënë ndonjëherë për një individ gjatë 15 viteve të fundit. Një juri në Baltimore vendosi se J&J, përfshirë dy nga degët e saj dhe Kenvue, ishin përgjegjës për mosparalajmërimin e Cherie Kraft për azbestin në pudrën e saj, i cili është i lidhur me mezoteliomën, një formë kanceri.
Vendimi i fundit erdhi pasi J&J është përballur me një numër gjyqesh lidhur me produktin e saj, duke dështuari këtë vit të përdorë procedurat e falimentimit për të zgjidhur më shumë se 70,000 padi. Dëmshpërblimi i dhënë në Merilend pason një tjetër në tetor, kur kompania u detyrua të paguante 966 milionë dollarë për familjen e një gruaje nga Kalifornia, e cila gjithashtu vdiq nga mezotelioma pas përdorimit të pudrës me bazë talku të J&J.
Kompania ka insistuar vazhdimisht se talku i saj nuk shkakton kancer dhe se produktet për foshnja kurrë nuk kanë përmbajtur azbest. J&J ka deklaruar se e ka tregtuar pudrën në mënyrë të sigurt për më shumë se 100 vjet. Në reagimin ndaj vendimit të gjykatës, Eric Haas, kreu i departamentit të padive të J&J, tha se do të apelojnë këtë vendim, duke e cilësuar atë si të paarsyeshëm dhe rezultat të gabimeve të gjykatës, që lejuan avokatët e paditëses të përdorin deklarata dhe akuza të papërshtatshme.
Ky rast është pjesë e një skandali më të gjerë që ka prekur J&J, duke e detyruar kompaninë të përballet me kritika dhe sfida ligjore në lidhje me sigurinë e produkteve të saj, në veçanti ato që përmbajnë talk. Rasti i Cherie Kraft shërben si një pikë e rëndësishme në historinë e kompanisë dhe implikimet e saj ligjore.
