Policia e Shtetit ka hyrë në një cikël të shpejtë ndryshimesh në nivelet drejtuese, duke shkaktuar një valë rokadash në të gjitha qarqet e vendit. Vetëm në pak ditë, janë ndërruar shefat e komisariateve në Kurbin, Gramsh, Elbasan, Pogradec, Korçë, Dibër, Sarandë, Himarë dhe Cërrik.
Ndërkohë që zyrtarisht nuk jepet një shpjegim i detajuar për këto lëvizje, burime të Publik.al nga brenda strukturave të policisë thonë se kemi të bëjmë me një përpjekje për të shkundur strukturat, sidomos pas rritjes së kriminalitetit në disa zona dhe denoncimeve për lidhje të mundshme të drejtuesve vendorë të policisë me grupet e krimit të organizuar.
Ndryshimet e fundit:
- Ajet Bega – Shef i ri i Komisariatit të Policisë Kurbin
- Leonard Ndreka – Shef i Komisariatit të Policisë Gramsh
- Krenar Guçe – Zëvendësdrejtor për Krimet në DVP Elbasan
- Gentian Dedej – Shef i Komisariatit të Policisë Pogradec
- Faik Ruko – Shef i Komisariatit të Policisë Korçë
- Florian Dano – Drejtues i Policisë Kufitare Dibër
- Elvid Shehu – Policinë Kufitare Sarandë
- Ferit Merkaj – Shef i Komisariatit të Policisë Himarë
- Kliton Zharri – Shef i Komisariatit të Policisë Cërrik
Ndryshimet pasojnë një seri lëvizjesh të kryera më herët në komisariatet e Tiranës, Shkodrës dhe Kukësit, çka tregon për një reformim të thellë strukturor, ose për një lëvizje politike për të zbutur zemërimin publik ndaj paaftësisë së policisë për të menaxhuar rendin dhe për të luftuar korrupsionin e brendshëm.
Megjithatë, mbetet për t’u parë nëse këto emërime janë thjesht rrotacion emrash apo një reflektim real mbi performancën dhe integritetin e drejtuesve lokalë të policisë. Në shumë raste të mëparshme, emërimet janë bërë mbi bazë klienteliste, duke nxjerrë jashtë loje oficerë me karrierë në favor të të “besuarve” të politikës.
