TURQI- Ministri i Brendshëm i Turqisë, Ali Yerlikaya, ka njoftuar të hënën se 1,133 persona janë arrestuar që nga fillimi i protestave kundër arrestimit të Ekrem Imamoglut në Turqi javën e kaluar. Ai gjithashtu paralajmëroi se terrorizmi i rrugës dhe kërcënimi për paqen dhe sigurinë e kombit nuk do të tolerohet.
“Terrorizimi i rrugëve tona dhe kërcënimi për paqen dhe sigurinë e kombit tonë absolutisht nuk do të tolerohen”,ka thënë Yerlikaya në një postim të gjatë në X.
Paraburgimi i Imamoglut ka ngjallur zemërim dhe një valë reagimesh, duke nxjerrë qindra mijëra qytetarë në rrugë, duke kërkuar dorëheqjen e Tayyip Erdogan. Nga ana e saj, opozita turke flet për një “moment historik”, pasi jo vetëm anëtarët e saj, por edhe qytetarët në 55 nga 81 provincat e Turqisë i dhanë mbështetjen Ekrem Imamoglu për të kandiduar për presidencën.
Megjithë ndalimet e tubimeve në natyrë në shumë qytete, demonstratat antiqeveritare u zhvilluan për natën e pestë të dielën (23/03), ndërsa Ekrem Imamoglu ishte dërguar tashmë në burgun e Silivrit. Duke iu drejtuar një demonstrate në Saraçane të Stambollit, kreu i CHP Özgür Özel tha se protestat do të vazhdojnë derisa Imamoğlu të lirohet. 100 turq të tjerë, duke përfshirë politikanë të tjerë, gazetarë dhe biznesmenë, u arrestuan si pjesë e një hetimi javën e kaluar. Vetëm numri i gazetarëve të ndaluar arrin në 10.
