Policia e Tiranës ka përgatitur plane të posaçme për garantimin e rendit dhe sigurisë gjatë tri aktiviteteve me pjesëmarrje të lartë që zhvillohen nga sot deri të dielën në kryeqytet. Aktivitetet përfshijnë tubimin në sheshin “Skënderbej”, Maratonën Fan Run dhe Maratonën e Tiranës, dhe do të sjellin kufizime të përkohshme të trafikut në disa akse kryesore.
Për të siguruar mbarëvajtjen e këtyre aktiviteteve, policia ka njoftuar se do të ketë bllokim të përkohshëm të qarkullimit në Bulevardin e Ri gjatë tubimit në sheshin “Skënderbej”, prej orës 17:00 deri rreth orës 19:00 sot. Për Maratonën Fan Run, më 18 tetor 2025, do të kufizohet lëvizja nga ora 09:00 deri në 11:00 në segmentin nga sheshi “Nënë Tereza” deri te bulevardi “Dëshmorët e Kombit”.
Në datën 19 tetor 2025, gjatë Maratonës së Tiranës, do të ketë kufizime të qarkullimit nga ora 08:00 deri në 16:00 në disa zona si: sheshi “Nënë Tereza”, bulevardi “Dëshmorët e Kombit” dhe rrugë të tjera përreth. Gjithashtu, do të pezullohet itinerari i mjeteve të transportit urban përgjatë bulevardit “Dëshmorët e Kombit” dhe sheshit “Nënë Tereza” nga ora 08:00 deri në 16:00, si dhe në të gjitha segmentet që kryqëzohen me këtë itinerar.
Në përputhje me këto masa, ndalohet qarkullimi i automjeteve për transport të përzier dhe atyre për transport pasagjerësh brenda Unazës së Madhe më 19 tetor. Ndërkaq, qarkullimi i mjeteve të Emergjencës dhe Policisë do të vazhdojë normalisht në të gjitha itineraret e përmendura.
Policia e Tiranës fton qytetarët të shmangin lëvizjen me mjete në zonat me kufizime, të përdorin rrugë alternative dhe të ndjekin udhëzimet e punonjësve të Policisë në terren për të garantuar sigurinë e gjithsecilit.
