Lëvizja Vetëvendosje ka reaguar ndaj protestës së paralajmëruar në sheshin “Skënderbej” në Tiranë për mbështetje të ish-krerëve të Ushtrisë Çlirimtare të Kosovës, aktualisht në paraburgim në Hagë. Në postimin e saj, partia thekson se ata që sot protestojnë kundër Gjykatës Speciale ishin në të kaluarën lobuesit kryesorë për krijimin e saj. Vetëvendosje kërkon që qeveria shqiptare ta adresojë këtë çështje në organizatat ndërkombëtare si OKB, OSBE, NATO, dhe BE, në vend që ta diskutojë në protesta.
Gjykata Speciale, sipas Vetëvendosje, ka qenë e nevojshme dhe e drejtë, pavarësisht pretendimeve të Prokurorisë për ekzistencën e një grupi kriminal brenda UÇK-së. Partia thekson se UÇK-ja nuk ka qenë një strukturë kriminale, përkundrazi, akuzat për krime të luftës duhet të kenë si target Serbinë për gjenocidin e kryer ndaj popullit të Kosovës.
Vetëvendosje ka kritikuar ata që sot protestojnë, duke përmendur se disa prej tyre, përfshirë Kryeministrin Edi Rama, patën rol aktiv në krijimin e Gjykatës Speciale. Partia kërkon që ata të shprehin pendesë për pozitat e tyre të kaluar. Në këtë kontekst, theksohet se drejtësia duhet të ndriçojë të vërtetën dhe që ajo mbetet në anën e popullit të Kosovës në luftën për çlirim.
Institucionet shqiptare janë ftuar të ngrejnë këtë çështje në forumet ndërkombëtare ku bëhet drejtësia, duke precizuar se është detyrë e shteteve mike të Kosovës të mbrojnë të vërtetën e luftës dhe të kërkojnë njohjen e krimeve të luftës të disa vendeve, përfshirë Serbinë.
Pas këtij reagimi, Kryeministri Rama e përshkroi deklaratën e Vetëvendosje si një “çarçaf” dhe theksoi se Gjykata Speciale u krijua për të hetuar trafikun e organeve, duke akuzuar Vetëvendosjen se dëshiron të mbajë Thaçin përjetësisht në Hagë. Në përgjigje, zëdhënësi i Vetëvendosjes, Arlind Manxhuka, kërkoi që Rama të sqarojë pozitat e tij në lidhje me themelimin e Gjykatës dhe të tregojë se kur ka ngritur shqetësimet mbi drejtësinë për Kosovën në organizatat ndërkombëtare.
