Është mbajtur pasditen e kësaj të marte një protestë para ambasadës shqiptare në Athinë, ku kërkohet lirimi i kryebashkiakut të sapozgjedhur të Himarës, Fredi Beleri, i cili akuzohet për shit-blerje votash.
Mediat greke shkruajnë se janë mbledhur me dhjetra persona në protestë, mes të cilëve vëllai i Fredi Belerit, si dhe kryetari i Unionit të Himarjotëve, Thodoris Goumas dhe kërkojnë lirimin e menjëhershëm të Fredi Belerit.
Siç shihet dhe nga foto e mëposhtme, në ballë të protestës qëndron ekstremisti grek Babis Karathanos, i cili ka dalë publikisht edhe gjatë fushatës në mbështetje të Fredi Belerit.
Emri i Babis-Harallambos Karathanos është i lidhur me masakrën e Peshkëpisë në prill të vitit 1994, ku u sulmua në mesnatë posta policore kufitare në Gjirokastër dhe për pasojë vriten dy ushtarakë shqiptarë.
Karathanos arrestohet një vit më pas në Greqi, pasi akuzohej nga autoritetet shqiptare si njeriu që hyri në territorin shqiptar bashkë me një grup të armatosur prej shtatë personash të cilët kryen masakrën. Mes të arrestuarve ishte edhe Fredi Beleri, por të gjithë të ndaluarit u liruan.
Në Tetor të vitit 2018 kur forcat Renea vranë në Bularat të Gjirokastrës, 35-vjeçarin Kostandinos Kaçifa, i cili sulmoi me armë policinë, në varrimin e tij nuk mungoi Babis Karathanos bashkë me Fredi Belerin.
Një vit më vonë në ditën përkujtimore të Kostandinos Kaçifa policia shqiptare i ndaloi hyrjen Babis Karathanos pasi ai ishte shpallur një person ‘non grata’ në Republikën e Shqipërisë.
Protesta e sotme në mbështetje të Fredi Belerit vjen një ditë pasi Gjykata e Posaçme i “ligjëroi” masën e sigurisë “arrest me burg”. Athina zyrtare ka reaguar ashpër për arrestimin e Belerit, por sipas shtetit shqiptar, kjo çështë nuk duhet të cënojë marrëdhënien dypalëshe, pasi e konsideron si një çështje gjyqësor dhe jo politike.
Ky është njoftimi i djeshëm për protestën e sotme të Belerit:
Qeveria shqiptare, kundër çdo koncepti ligji, vendosi sot të vijojë burgosjen për kryebashkiakun e Himarës, Fredis Beleris dhe shtetasin Pantelis Kokavesis. Përballë këtij zhvillimi, Unioni i Himariotëve do të ushtrojë të gjithë fuqinë që mundet që bashkatdhetarët tanë të lirohen ashtu siç e meritojnë.
Ftojmë të gjithë himarjotët që jetojnë në Athinë por edhe çdo vorioepirot, çdo heladit, çdo qytetar të Greqisë dhe Shqipërisë që e kupton këtë padrejtësi të bashkohet me ne në protestën paqësore që po organizojmë të martën e datës 23 maj në orën 06.00 të pasdites në a. Ambasada Shqiptare e Athinës ( Nr. Vekiareli 7, Filothei).
Le të japim të gjithë së bashku mesazhin se praktikat e shigurimit nuk do të mbeten pa përgjigje.
