Një grabitje e guximshme në muzeun Louvre në Paris ka rezultuar në vjedhjen e bizhuterive me një vlerë prej 88 milionë eurosh, sipas prokurores Laure Beccuau. Ajo e cilësoi këtë shumë si “jashtëzakonisht të lartë”, duke theksuar se humbja më e madhe është për trashëgiminë historike të Francës.
Në mesin e objekteve të vjedhura ndodhen bizhuteritë e kurorës, përfshirë një gjerdan me diamante dhe smeralde, të dhuruara nga perandori Napoleon për gruan e tij, si dhe bizhuteri të perandoreshës Eugenie dhe të mbretëreshës Marie-Amelie. Grabitja ndodhi të dielën në mëngjes, pak minuta pas hapjes së muzeut, ku katër hajdutë të maskuar përdorën një kamion me ngritës mekanik për të hyrë në Galerinë e Apollonit përmes një ballkoni. Ata kërcënuan rojet, duke i detyruar ato të evakuonin godinën. I gjithë operacioni zgjati më pak se tetë minuta.
Pavarësisht nga hetimet, autoritetet nuk kanë identifikuar ende autorët e grabitjes. Ekpertët paralajmërojnë se bizhuteritë mund të jenë zhdukur ose shkrirë për të shmangur zbulesën dhe për t’u shitur ilegalisht jashtë vendit. Prokurorja Beccuau shpreson që publikimi i vlerës do të ndikojë tek grabitësit që të mos dëmtojnë sendet. Ajo theksoi se nëse ata mendojnë të shkrihen, kjo do të ishte një “ide e keqe”.
Presidenti Emmanuel Macron e ka cilësuar grabitjen si një sulm ndaj trashëgimisë franceze. Hetimet kanë nxjerrë në pah dështime serioze në sistemet e sigurisë të muzeut më të vizituar në botë, përfshirë mungesën e kamerave në një të tretën e sallave dhe aktivizimin e vonuar të alarmit. Ministri i Drejtësisë, Gérald Darmanin, e pranoi dështimin e protokolleve të sigurisë dhe e quajti grabitjen një “imazh të tmerrshëm për Francën”.
