Prokuroria Speciale e Kosovës ka urdhëruar Policinë për të mbledhur informacione dhe prova në lidhje me Shkëlzen Gashin, autorin e një ekspozite që akuzohet për pasaktësi mbi masakrat serbe gjatë luftës në Kosovë. Kjo ka ardhur pas raportimeve nga të dëmtuarit e masakrës së Dubravës dhe viktimave të tjera, të cilat evidentojnë një përpjekje për të deformuar të vërtetën e luftës çlirimtare. Prokuroria ka hapur një rast penal ndaj Gashit për “nxitje të përçarjes dhe mos durimit”, siç parashikohet në nenin 141 të Kodit Penal të Kosovë.
Në këtë kontekst, Prokurori ka autorizuar Zyrtarët policorë nga Drejtoria Kundër Krimit të Organizuar që të ndërmarrin menjëherë veprime hetimore për të sqaruar rrethanat e veprimeve të Gashit dhe për të siguruar prova të tjera. Prokuroria ka kërkuar që Gashi të intervistohet si i dyshuar dhe të sqarojë burimet e informacionit që ka publikuar, të cilat konsiderohen të pavërteta.
Dy organizatat Integra dhe Admovere, që kanë autorësinë e ekspozitës të kritikuar, kërkuan falje dhe bënë thirrje për një “diskutim të hapur” për këtë çështje. Ekspozita shkaktoi indinjatë të gjerë, duke bërë që Komuna e Prishtinës të revokonte lejen e shfaqjes së saj, për më tepër, doli se ishte financuar nga Kuvendi i Kosovës. Kjo çoi në një protestë nga organizatat e kategorive të dala nga lufta në Kosovë.
Shkëlzen Gashi në një deklaratë tha se informacionet mbi masakrat ishin mbështetur në listën e të vrarëve nga “Libër Kujtimi i Kosovës”, një publikim nga Fondi për të Drejtën Humanitare, të drejtuar nga aktivisten serbe Natasha Kandiq. Megjithatë, ky fond ka reaguar duke theksuar se të dhënat e paraqitura në ekspozitë janë të pasakta dhe tregojnë një mungesë njohurish mbi të drejtën ndërkombëtare humanitare dhe faktet e vërtetuara në gjykata.
