Në mesditën e sotme, lumi Seman ka çarë argjinaturën në disa segmente te fshatrat Ndërnënas dhe Hasturkas në Libofshë, si rezultat i prurjeve të shumta. Pasojat janë alarmante, pasi uji ka vërshuar tokat bujqësore përreth, duke shkaktuar panik te banorët e zonës. Ata shprehen se nuk kanë parë kurrë një nivel kaq të lartë prurjesh dhe kanë frikë për përkeqësimin e situatës, pasi ujërat po i afrohen zonave të banuara.
Për të përballuar këtë krizë, forcat e Bordit të Kullimit janë angazhuar në terren, duke përdorur mjete të rënda për të disiplinuar ujërat që po derdhen në kolektorin e hidrovori të Darëzezës. Objektivi kryesor është parandalimi i përmbytjes së banesave dhe paneleve fotovoltaike. Situata në terren është nën monitorim të vazhdueshëm, dhe autoritetet kërkojnë nga banorët që të tregojnë kujdes të shtuar.
Në të njëjtën kohë, qindra hektarë tokë bujqësore janë nën pushtetin e ujit, gjë që mund të ketë pasoja të rënda për bujqësinë dhe ekonominë lokale. Autoritetet e kompetente po punojnë për të menaxhuar situatën dhe për t’i bërë ballë sfidave që sjell ky fenomen i natyrës.
