TIRANË- Është shtyrë përkohësisht seanca gjyqësore ndaj ish-deputetit të PS-së, Jurgis Çyrbja, i cili pritej të njihej me masën e sigurisë “arrest në burg”. Avokatët e ish-deputetit kërkuan të njihen me aktet hetimore, pasi nuk u janë vendosur më herët në dispozicion nga gjykata. Çyrbja u arrestua me urdhër të SPAK pak ditë pasi la mandatin si deputet.
Ai akuzohet për tre veprat penale “Tregimi i sekretit shtetëror nga shtetasit”, “Përkrahja e autorit të krimit” dhe “Korrupsion aktiv në zgjedhje”. Bashkë me Çyrbjan u arrestua dhe Ahmet Masha i cili akuzohet për veprat penale “Tregimi i sekretit shtetëror nga shtetasit” dhe “Përkrahja e autorit të krimit”. Po ashtu i shpalluri në kërkim, personazhi i botës së krimit, Altin Hajri, akuzohet për veprën penale “Korrupsioni pasiv në zgjedhje”.
Sipas Prokurorisë së Posaçme, Jurgis Çyrbja, Ahmet Masha dhe Altin Hajri kanë komunikuar ndërmjet tyre edhe me anë të aplikacionit të enkriptuar “Sky Ecc”. Po ashtu thuhet se ish-deputeti është vënë në dijeni edhe të disa planeve operacionale të Policisë së Shtetit, lidhur me kontrollet që do zhvilloheshin në zonën e Durrësit, me qëllim për të kapur personat e shpallur në kërkim dhe ky informacion që sipas ligjit përbën sekret shtetëror u është transmetuar personave të shpallur në kërkim, si drejtëpërdrejtë prej tij, ashtu edhe përmes angazhimit të personit tjetër Ahmet Mashës.
Sipas SPAK, në kohën e kryerjes së veprave penale, Jurgis Çyrbja ka qenë deputet i Kuvendit të Shqipërisë, i cili ka patur një marrëdhënie miqësore me personazhin e botës së krimit Altin Hajrin, i shpallur në kërkim ndërkombëtar për rrëmbimin dhe vrasjen e Jani Prengës. Çyrbja për shkak të funksionit të tij si deputet i ka ofruar favorizime të ndryshme Hajrit, duke ndërhyrë në agjenci të ndryshme të zbatimit të ligjit në Shqipëri, me qëllim favorizimin e tij apo të lidhjeve të ngushta familjare e shoqërore.
Ndërkohë në këmbim të këtyre favoreve të siguruara, Altin Hajri i ofronte Çyrbes që të votonte si dhe të siguronte votues në funksion të mbështetjes së tij si kandidat për deputet në Qarkun e Durrësit, në zgjedhjet parlamentare të vitit 2021.
