Princi William dhe Princesha Catherine kanë arritur një sukses në gjyqin e tyre për shkelje të privatësisë ndaj revistës franceze Paris Match. Ky vendim erdhi pas publikimit të fotografive paparaci që dokumentonin momentet e pushimeve të çiftit mbretëror dhe fëmijëve të tyre në Alpet franceze.
Pallati Kensington njoftoi se çiftin mbretëror kishte ndërmarrë veprime ligjore në prill, pas publikimit të fotove që tregonin Princin George, Princeshën Charlotte dhe Princin Louis, duke u relaksuar dhe luajtur në borë. Gjykata franceze e konfirmoi se përmbajtja e revistës kishte cënuar të drejtën e respektit ndaj jetës private dhe imazhit të princit dhe princeshës, si dhe të fëmijëve të tyre. Si ndëshkim, Paris Match u detyrua të publikojë një njoftim gjyqësor dhe të mbulojë shpenzimet ligjore të çiftit.
Një zëdhënës i Pallatit Kensington shprehu kënaqësinë për këtë vendim, duke theksuar rëndësinë e mbrojtjes së privatësisë familjare, pavarësisht angazhimeve publike. Ai nënvizoi angazhimin e William dhe Catherine për të mbrojtur jetën private të fëmijëve të tyre dhe shprehu se ata nuk do të hezitojnë të ndërmarrin hapa të ngjashëm në të ardhmen nëse është e nevojshme.
Ky rast është i dyti që çifti fiton ndaj mediave franceze. Në vitin 2017, ata morën një dëmshpërblim prej 100 mijë eurosh nga revista Closer, e cila publikoi fotografi topless të Princeshës Catherine gjatë një pushimi në Provence në vitin 2012, një rast që gjithashtu u konsiderua si shkelje e rëndë e privatësisë.
Ky vendim i fundit është një mesazh i qartë për mediat në lidhje me të drejtat e privatësisë të familjeve mbretërore dhe përshtatshmërinë e veprimeve gazetareske.
