Presidenti i Republikës, Bajram Begaj, pret në Shqipëri udhëheqësit e vendeve anëtare të Procesit të Brdo-Brijunit për një samit dy-ditor, që këtë vit është organizuar në vendin tonë. Ky takim, i cili përfshin Shqipërinë, Kosovën, Malin e Zi, Maqedoninë e Veriut, Bosnjën dhe Hercegovinën, si dhe Serbinë, fokusohet në çështjet që prekin rajonin dhe proceset integruese të Ballkanit Perëndimor.
Temat kryesore të diskutimeve përfshijnë bashkëpunimin rajonal, marrëdhëniet e fqinjësisë së mirë, integrimin evropian, Planin e Rritjes të BE-së, si dhe hartimin e politikave për mbajtjen e fuqisë së kualifikuar punëtore, me theks të veçantë te rinia. Një nga ngjarjet kryesore të samitit është Seanca Plenare, ku Presidenti Begaj do të mbajë një fjalë hapëse, dhe gjithashtu një konferencë për shtyp e përbashkët me homologët e tij nga Sllovenia dhe Kroacia, dy shtete bashkëkryesuese të “Brdo-Brijuni-t”.
Pjesë e këtij samiti janë parashikuar edhe takime dypalëshe mes liderëve pjesëmarrës, që do të ndihmojnë në avancimin e marrëdhënieve dhe bashkëpunimit mes vendeve të rajonit. Nga ky samit pritet që të dalin konkluzione të rëndësishme, që do të shërbejnë si shtysë për progresin dhe rritjen e bashkëpunimit.
Agjenda e samitit përfshin ceremoninë zyrtare të mirëseardhjes më 6 tetor, ku Presidenti Begaj do të presë liderët e delegacioneve. Pas një fotoje për familje, do të zhvillohet Seanca Plenare nga ora 11:00 deri në 13:00, pas të cilës do të mbahet konferenca e përbashkët për shtyp.
Samiti i Brdo-Brijunit, i filluar në vitin 2010 nga Sllovenia dhe Kroacia, ka për qëllim forcimin e bashkëpunimit në rajon dhe promovimin e integrimit evropian, duke ndihmuar vendet për të përballuar sfidat e përbashkëta.
