Ministrja për Europën dhe Punët e Jashtme, Elisa Spiropali, ndodhet në Kopenhagen të Danimarkës, ku është pritur nga Ministri i Jashtëm danez, Lars Løkke Rasmussen. Takimi mes të dyve u përqendrua në thellimin e bashkëpunimit dypalësh, veçanërisht në kontekstin e presidencës daneze të BE-së. Spiropali theksoi se reformat që Shqipëria ka ndërmarrë për të ardhur në përputhje me standardet e BE-së janë të njohura dhe vlerësohen si një aset për dinamikën e zgjerimit të saj.
Duke u shprehur si aleatë në NATO, Spiropali dhe Rasmussen rikonfirmuan angazhimin për një Europë më të sigurt dhe të begatë. Ministri danez vuri në dukje progresin e Shqipërisë në mirëqeverisje dhe demokraci, duke e afruar atë me objektivin e anëtarësimit në BE.
Gjatë vizitës, Spiropali gjithashtu u takua me Ministren daneze për Europën, Marie Bjerre, ku diskutuan për avancimin e agjendës së integrimit të Shqipërisë. Spiropali shprehu besimin se nën presidencën daneze të BE-së do të arrihet të hapet grupi i fundit i negociatave për anëtarësim brenda Nëntorit, si dhe të mbyllen grupet e tjera ku Shqipëria ka plotësuar kriteret.
Ajo mori pjesë në një tryezë të Institutit Rasmussen Global, diskutimin mbi procesin e zgjerimit dhe ndikimin e tij në Europë. Spiropali theksoi se rruga drejt anëtarësimit për Shqipërinë është një histori e transformimit të thellë politik, ekonomik dhe shoqëror.
Gjatë kësaj vizite, ajo do të ketë edhe një takim me Komitetin e Politikës së Jashtme të Parlamentit danez dhe do të mbajë një fjalë në Universitetin e Kopenhagës mbi reformat e Shqipërisë në kontekstin e zgjerimit të BE-së. Vizita e saj në Kopenhagë shënon një moment të rëndësishëm për marrëdhëniet mes Shqipërisë dhe Danimarkës, duke pasqyruar përkushtimin e të dyja vendeve për të forcuar dialogun dhe mbështetur perspektivën evropiane të Shqipërisë.
