Premiera e shumë përfolur e filmit më të fundit shqiptar ‘Në Kuadër të Dashurisë’, ndodhi mbrëmjen e djeshme, disa nga skenat i zbuluam nga aktorët protagonistë, e tani na ngelet që krijimin e fundit kinematografik shqiptar ta shijojmë nga kinemaja.
Por derisa të arrijmë atje, lë t’u hedhim një sy prapaskenave të premierës së sotme, kush ishin të ftuar, si u paraqitën ata…? E shumë e shumë detaje.
Ja nisim nga protagonistët e filmit, Luiz, Olta, Sara ishin ndër të parët që parakaluan në tapetin e kuq të premierës që u zhvillua në Pallatin e Kongreseve.
Luizi sigurisht erdhi i shoqëruar nga Kiara krah së cilës gjeti rastin edhe të thoshte dy fjalë për të por edhe fansave.
“Të mundja të shtyja orarin do t’ju takoja të gjithëve. Shumë kanë thënë që është filmi i Luizit dhe Oltës, por është filmi juaj. Fal mbështetjes tuaj janë këtu. U jam mirënjohës gjithë jetën, ju kam thënë që më keni ndryshuar jetën. Kam marrë vajzën më të mirë në botë. Ju dua të gjithëve, Zoti jua shpërbleftë”- tha Luizi.
Sakaq, vajzat, Sara dhe Olta zgjodhën që këtë parakalim në tapetin e kuq ta bënin vetëm, pasi ndryshe nga të ftuarit e tjerë ato nuk ishin krahë partnerve të tyre.
Përpos kësaj ajo që ndoshta nuk pamë ishin incidentet që janë shmangur me stil por syrit kurioz të paparacëve nuk u kanë shpëtuar. Sara Hoxha u pengua me fustanin, teksa po bëhej gati të pozonte, megjithatë ajo ndau dy-tre detaje për eksperiencën e saj në film.
“Kur janë kamerat aty nuk je vetvetja, më e vështira ishte të kuptoje ca kërkonte regjisori, pra Kolo nga unë dhe të arrija të bëja atë që donte Kolo mendoj se e realizova”, tha ajo.
Një incident ndodhi edhe me Dea Mishel, e cila teksa po zbriste nga makina për të parakaluar në tapetin e kuq, u ekspozua më tepër se duhet.
Të tjerë të famshëm që parakaluan ishin Bora Zemani e shoqëruar nga Donald Veshaj dhe vëllai i tij Romeo. Po ashtu edhe modelja Jori Delli ishte e pranishme.
