Vetëm pak ditë pas përvjetorit të 25-të të titullit të parë botëror me Ferrarin, kanë dalë informacione të reja për gjendjen shëndetësore të legjendës së Formula 1, Michael Schumacher. Lajmet vijnë nga gazetari francez Stefan L’Hermitte i “L’Équipe”, i cili ka përpjekur të mbledhë çdo informacion të besueshëm lidhur me Schumacherin, përmes burimeve nga familja e tij, burimi kryesor në mes të spekulimeve që qarkullojnë pas aksidentit të tij të rëndë në vitin 2013.
L’Hermitte ka theksuar se “nuk dimë asgjë specifike” për gjendjen aktuale të Schumacher-it, por sugjeron se mund të ketë bërë përparime, duke e cilësuar atë si “ndoshta pak më mirë”. Ai solli në vëmendje edhe një episod të fundit ku një helmetë e firmosur nga Schumacher u përdor për një nismë bamirësie, duke ngjallur pyetje të shumta. “Si ia doli ta nënshkruante? A ia mbajti dorën gruaja e tij, Corinna?” u shpreh L’Hermitte, duke theksuar se kjo është hera e parë që kemi një shenjë pozitive prej tij, që mund të interpretohet si një “shenjë jete”.
Megjithatë, për gjendjen fizike të Schumacherit, gazetari nuk ofroi detaje të qarta. Ai theksoi se Schumacher nuk flet dhe nuk është parë të ecë, duke sugjeruar një nivel të ulët të ndërveprimit me familjen e tij. L’Hermitte përmendi se, pavarësisht përmirësimeve të mundshme, nuk mund të thuhet se ai është mirë.
Michael Schumacher, kampioni gjerman, pësoi një aksident të rëndë në ski në dhjetor 2013 në Alpet Franceze dhe që atëherë ka qenë nën kujdes të vazhdueshëm mjekësor në shtëpinë e tij në Zvicër. Familja e tij ka ruajtur gjithmonë një qasje diskrete duke shmangur çdo koment publik lidhur me gjendjen e tij shëndetësore.
