SPANJË- Autoritetet spanjole kanë zhvilluar dy operacione antidrogë në Barcelonë. Mësohet se nga këto operacione janë zbuluar dy plantacione me drogë. Gjithashtu raportohet se se është shkatërruar një bandë shqiptare e kultivimit dhe trafikimit të lëndëve narkotike.
7 persona janë vënë në pranga në dy aksione të ndryshme në pak ditë. Një plantacion marijuane të fshehur në katër depo u zbulua pranë autostradës N-230, midis distriktit Gualda të Lleidës dhe Torrefarrerës. Oficerët arritën të arrestonin edhe 3 të rinj shqiptarë, të moshës 24, 25 dhe 26 vjeç, të cilët i kapën ndërsa po bëheshin gati të korrnin më shumë se 3500 bimë kanabisi. Të arrestuarit, të gjithë kopshtarë, akuzohen për një krim kundër shëndetit publik dhe një tjetër për mashtrim me furnizimin me energji elektrike.
Tre të rinjtë ishin përgjegjës për ruajtjen e plantacionit dhe sigurimin e rritjes së duhur të bimëve. Policia tha se ata u kapën teksa ishin gati për të korrur prodhimin. Policia zbuloi një tjetër plantacion marihuane në zonën industriale Cometes në Torrebesses. Katër burra, gjithashtu shqiptarë, u arrestuan dhe u akuzuan për pjesëmarrje në një grup kriminal, shkelje të rregulloreve të shëndetit publik dhe mashtrim të furnizimit me energji elektrike.
Droga ndodhej në një fermë të braktisur, e cila ishte përshtatur për kultivim kanabisi. Për këtë arsye, ata kishin lidhur një kullë me tension të lartë pranë fermës. Dy nga të arrestuarit u liruan me kusht po atë ditë, pasi dëshmuan në stacionin e policisë, ndërsa të tjerët u sollën para Gjykatës së Shkallës së Parë të Lleidës.
