Agjencia e Mbikëqyrjes Policore në Rajonin Tiranë ka arrestuar punonjësin e policisë, Inspektor M. L., i angazhuar në Bllokun e Sigurisë në DVP Tiranë. Ai dyshohet për veprat penale “Shpërdorim i detyrës”, “Prodhimi dhe shitja e narkotikëve”, si dhe “Moskallëzim i krimit”.
Arrestimi erdhi si rezultat i informacioneve konfidenciale të siguruara nga Drejtoria Rajonale e AMP-së Tiranë, ku u konstatua se Inspektori planifikonte një takim për blerjen e disa dozave të lëndës narkotike, e cila dyshohet se është kokainë. Qëllimi i tij ishte shitja e këtyre dozave në ambientet e Bllokut të Sigurisë, vendi ku ai ushtronte detyrën.
Gjatë kontrollit fizik, autoritetet gjetën një dozë lënde narkotike që peshoi 0.4 gram, bashkë me 70 euro, të cilat u sekuestruan si prova materiale.
Materialet e hetimit janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Tiranë për procedura të mëtejshme ligjore.
