Agjencia e Mbikëqyrjes Policore (AMP) në rajonin e Tiranës ka arrestuar në flagrancë inspektorin D. G., punonjës në Njësinë e Ceremonialit pranë Drejtorisë së Përgjithshme të Policisë së Shtetit. Arrestit është bërë për veprat penale, “Drejtim të automjeteve në mënyrë të parregullt” dhe “Largimi nga vendi i aksidentit”, të parashikuara nga Kodin Penal.
Ngjarja ndodhi mbrëmjen e djeshme, rreth orës 20:25, në “Rrugën e Dibrës”, ku D. G. u përfshi në një aksident automobilistik, si pasojë e të cilit u dëmtua shtetasja E. M., e cila u transportua me urgjencë në Spitalin e Traumës, jashtë rrezikut për jetën. Pas aksidentit, inspektori largohet nga vendi i ngjarjes dhe kapet më vonë në afërsi të Urës së Babrrusë. Gjatë verifikimit, testi i alkoolit rezultoi pozitiv me 1.03 mg/l.
Materialet proceduriale janë dorëzuar në Prokurorinë pranë Gjykatës së Shkallës së Parë të Juridiksionit të Përgjithshëm në Tiranë. AMP vë në dukje angazhimin e saj të vazhdueshëm për të garantuar zbatimin e ligjit dhe inkurajon qytetarët të denoncojnë çdo rast abuzimi ose shkeljeje nga punonjësit e policisë. Qytetarët mund të kontaktojnë me AMP përmes numrit të gjelbër 0800 9090 ose përmes emailit, si dhe përmes WhatsApp në numrin 0694151511. Po ashtu, AMP sugjeron shkarkimin e aplikacionit “Agjencia Digjitale” nga Play Store dhe App Store për ankesa dhe informacione të tjera.
