ITALIA- Kryeministrja italiane Giorgia Meloni, ka replikuar në rrjetet sociale ndaj organizatës joqeveritare “Sea Watch”, e njohur për kontributin e saj në shpëtimin e emigrantëve në det, që synojnë të mbërrijnë në brigjet e Italisë dhe jo vetëm.
Konkretisht, në një postim në rrjetin social “Sea Watch”, thotë se qeveria e vetëshpallur patriote e Melonit po shpenzon miliona euro për të burgosur mijëra emigrantë në Shqipëri. Gjithashtu në postim shtohet se paratë e taksapaguesve mund të ishin përdorur më mirë.
Nga ana tjetër, kryeministrja Meloni ka reagur duke komentuar se qeveria po punon për të mbrojtur kufijtë italianë dhe për të ndaluar trafikun e qenieve njerëzore, përmes veprimeve konkrete dhe marrëveshjeve ndërkombëtare.
“Çfarë skandali! Një qeveri që me një mandat të qartë të marrë nga qytetarët punon për të mbrojtur kufijtë italianë dhe për të ndaluar trafikun e qenieve njerëzore, përmes veprimeve konkrete dhe marrëveshjeve ndërkombëtare”, shkruan Meloni.
Dje, ministri i Brendshëm i Italisë, Matteo Piantedosi, ka deklaruar se këtë javë do të mbërrijnë emigrantët e parë në kampin e Gjadrit. Piantedosi, teksa fliste në një aktivitet në Firence, tha se nuk do të ketë ndonjë ceremoni për hapjen e qendrave. Ai garantoi se qendrat në Shqipëri do të jenë të ngjashme për nga standardet me ato të hapura në Itali. Po ashtu Piantedosi ka shtuar se emigrantët do të kenë të garantuar sigurinë dhe të drejtat e tyre deri në shqyrtimin e kërkesës për azil.
