Lumbardh Salihu është shpallur fitues i edicionit të dytë të Big Brother VIP Kosova. Ish-futbollisti me origjinë nga Vitia ka rezultuar banori më i votuar mes katër finalistëve, ndërkohë që përfaqësuese nga Shqipëria ishte Shqipja, e cila u rendit në vendin e tretë. Ndërkohë që në vendin e dytë u rendit këngëtari Blerando, dhe në vendin e katërt transgjinorja Edona James.
Përgjatë qëndrimit në Big Brother VIP Kosova, Lumbardhi u etiketua si një djalë i kulturuar dhe me edukatë – i cili herë pas here krijonte edhe situata dhe merrte pjesë edhe në debate të ndryshme.
Salihu si banori i fundit i shtëpisë, i fiku të gjitha dritat e Big Brother VIP Kosova në fund të finales.
Në fund të mbrëmjes, Lumbardhit iu dorëzua çeku final, vlera e të cilit ishte plot 144 mijë euro.
Këtë edicion, banorët kanë pasur për detyrë që të “ndërtojnë” vet çmimin e madh, në bazë të sfidave javore që u janë dhënë në shtëpi.
Maksimumi që ata mund të arrinin ka qenë shifra 200 mijë euro, ku nga 10 mijë euro i ndahen secilit finalist.
Kështu, teksa Shqipja, Blerando dhe Edona kanë marrë nga 10 mijë euro respektivisht, Lumbardhi ka fituar 144 mijë euro nga 170 mijë, që do të thotë se 26 mijë euro nuk kanë arritur që të fitohen nga banorët.
