Agim Duraku nga Yzberishti ka denoncuar rrezikun që i kanoset atij dhe familjes së tij nga disa plepa të mëdhenj pranë banesës së tij, duke e sjellë çështjen në emisionin “Fiks Fare”. Frika e tij ka një bazë të fortë, pasi një nga plepat është shembur nga era e fortë në vitin 2019, duke shkaktuar dëme materiale të konsiderueshme.
Duraku thekson se ndodhia e asaj kohe mund të kishte pasur pasoja të rënda nëse fëmijët e tij do të kishin qenë jashtë. Prej vitesh ai ka kërkuar ndihmë nga Njësia Administrative Kashar dhe Njësia 14, por ndërhyrja e vetme ka qenë një prerje e pjesshme para dy vitesh. Megjithatë, plepat janë rritur sërish dhe rreziku është shtuar.
Në përpjekjet e tij për të ndihmuar situatën, Duraku është përballur me justifikimet e institucioneve se plepat ndodhen në pronë private, gjë që pengon ndërhyrjen. Administratori i Njësisë Administrative nr.14 pranon se është i njohur me rastin, por thekson kufizimet për shkak të statusit të pronës.
Pas insistimit, ai premton dërgimin e një shkresë zyrtare në Drejtorinë e Emergjencave Civile për një vlerësim rreziku. Dekani i Fakultetit të Shkencave Pyjore, Ervin Toromani, shpjegon se plepat përballet me rrezik të shtuar gjatë erërave të forta, duke theksuar se distanca minimale nga banesat duhet të jetë të paktën 5 metra. Ai rekomandon prerjen e plepave mbi 40 vjeç, veçanerisht ata që shfaqin shenja tharjeje apo kalbëzimi.
Drejtoria e Pastrimit dhe Gjelbërimit gjithashtu ka konfirmuar se një prej plepave ka nevojë për prerje urgjente, por sërish ndërhyrja pengohet nga statusi privat. Sidoqoftë, pronari i pemëve është dakord për prerjen e tyre, duke theksuar rëndësinë e sigurisë për njerëzit.
Pas ndërhyrjes së “Fiks Fare” dhe kontakteve me Emergjencat Civile, më në fund është bërë e mundur prerja e plepit, duke mbyllur një shqetësim që kishte zgjatur mbi 7 vjet.
