Dinamika e konfliktit të ndodhur dje në Bilisht është zbardhur nga policia, e cila njofton arrestimin e dy personave dhe procedimin e dy të tjerëve. Të arrestuarit janë G. M., 39 vjeç, dhe Y. Xh., 37 vjeç, të dy banues në Bilisht. G. M. është ndaluar për veprat penale si “Plagosja e lehtë me dashje”, “Prodhimi dhe mbajtja pa leje e armëve të ftohta”, “Prishja e rendit dhe qetësisë publike”, si dhe “Shkatërimi i pronës”. Ndërkaq, Y. Xh. është arrestuar për “Drejtimin e automjetit në mënyrë të parregullt”.
Ngjarja ka ndodhur rreth orës 11:00, kur G. M. ka konfliktuar me T. Ç. dhe M. B. për motive të dobëta, duke plagosur T. Ç. me thikë. Pas këtij përplasjeje, Y. Xh., së bashku me T. Ç. dhe M. B., ndoqën automjetin e G. M., të cilin e sulmuan fizikishtë dhe dëmtuan me sende të forta.
Policia ka ndërhyrë menjëherë pas njoftimit për konfliktin, duke organizuar veprime për parandalimin e përshkallëzimit të situatës dhe identifikimin e personave të përfshirë. Pas hetimeve, katër shtetasit e implikuar u shoqëruan në komisariat, ku G. M. dhe Y. Xh. u arrestuan në flagrancë.
Gjithashtu, janë proceduar në gjendje të lirë T. Ç. dhe M. B. për akuzat e “Shkatërrimit të pronës” dhe “Dëmtimeve të tjera me dashje”. Hetimet e policisë kanë zbuluar se Y. Xh. drejtonte automjetin në mënyrë të parregullt, pa leje drejtimi.
Materialet procedurale janë dërguar Prokurorisë së Korçës për veprime të mëtejshme. Policia ka sekuestruar thikën e dyshuar të përdorur për plagosjen dhe dy automjete, ndërkohë që vijojnë kontrollet dhe hetimet për këtë çështje.
