Futbolli italian po përjeton një tronditje të madhe pas lajmit për aksidentin tragjik të portierit të dytë të Interit, Josep Martinez, në Appiano Gentile, ku humbi jetën një 81-vjeçar. Ngjarja ndodhi mëngjesin e së martës, ndërsa Martinez, 27 vjeç, ishte në drejtimin e automjetit të tij.
Martinez, i lindur në Alzira të Spanjës, u transferua në Milano verën e vitit 2024. Pas një sezoni të suksesshëm me Genoan, Interi e bleu atë për 13 milionë euro plus 2 milionë euro bonuse, duke e konsideruar si një investim për të ardhmen e klubit. Ai erdhi nga një familje me tradita në portë, pasi babai i tij kishte ushtruar këtë profesion, dhe filloi të luante në moshën pesëvjeçare. Talenti i tij u zbulua nga skautët e Barcelonës, ku ai kaloi dy sezone në akademinë e njohur “La Masia”.
Në vitin 2018, vendosi të kalonte te Las Palmas, ku debutojë me ekipin e parë në vitin 2019. Pas një periudhe të shkurtër te Leipzig, ku gjeti pak hapësirë, ai arriti në Genoa në vitin 2022, ku u bë portieri titullar dhe ndihmoi ekipin të ngjitej në Serie A. Performancat e tij në sezonin pasardhës ishin të shkëlqyera, duke u klasifikuar në mesin e portierëve me më pak gola të pësuar.
Martinez bëri debutimin për Interin më 19 dhjetor 2024 në Kupën e Italisë dhe më 22 shkurt 2025 në Serie A. Gjatë sezonit të fundit, ai zhvilloi 10 ndeshje dhe u konsiderua një zëvendësues i denjë për Yann Sommer. Pas aksidentit tragjik, ai ndodhet në një gjendje shoku dhe autoritetet italiane po hetojnë për të zbardhur rrethanat e ngjarjes që i mori jetën 81-vjeçarit Paolo Saibene.
