Sekretari i Përgjithshëm i Partisë së Lirisë, Tedi Blushi, ka denoncuar tenderat e marramendëse të qeverisë Rama, duke i cilësuar fyese për ekonominë e shqiptarëve.
Në një postim në Facebook, Blushi shkruan se Rama shpenzon mijëra euro për luks ndërsa qytetarëve në nevojë u ndan ndihma ekonomike me “thërrime”.
Blushi thekson se Rama u kërkon sakrifica shqiptarëve në kohë krize ndërsa vetë shpërdoron paratë publike për për blerje absurde tantellash, kupa akulloresh etj.
“Mijëra euro taksa për luksin e shfrenuar të Edi Ramës: Tendera për blerje tantellash, kupa akulloresh, gota kristali, mermer për sapunë, shezlong e çadra plazhi Kur qindra mijëra shqiptarë luftojnë çdo ditë për të mbijetuar, Qeveria keqpërdor me babëzi taksat e qytetarëve për t’i garantuar Edi Ramës dhe oborrit të tij një jetesë luksi. Drejtoria e Shërbimeve Qeveritare vetëm këtë muaj ka shpallur katër tendera (dokumentat bashkëlidhur) për blerje krejtësisht të panevojshme dhe fyese, nga tantellat deri në dyshekë plazhi (jemi në muajin tetor) për shtëpitë e tij të pushimit.
Ndërkohë që për qytetarët në nevojë dhe nëpunësit e administratës ndan ndihma ekonomike me “thërrime”, të moshuarve nuk u rrit pensionet dhe pedagogëve në protestë u thotë se Buxheti i Shtetit nuk ka para për t’u rritur rrogat, Edi Rama vazhdon shpenzimet marramendëse për t’i garantuar vetes të tilla “salltanete”. Kryeministri u kërkon sakrifica shqiptarëve në këtë kohë krize por vazhdon të shpërdorojë frikshëm paratë publike për luksin e vet. Ndaloni urgjentisht prokurimet kriminale dhe ndani këto fonde për shtresat më në nevojë!”, shkruan Blushi.
