Klubi Dinamo ka reaguar ndaj vendimit të Federatës Shqiptare të Volejbollit (FSHV) për të pezulluar Nayara Ferreira nëse ajo nuk kryen analiza për “verifikimin e gjinisë”. Në një deklaratë zyrtare, klubi shpreh mirënjohjen për mbështetje të gjerë nga media, sportistë, organizata dhe opinioni publik, duke e cilësuar vendimin e FSHV-së si absurde dhe cënuese për dinjitetin e një lojtareje me 15-vjeçarë karrierë ndërkombëtare.
Dinamo thekson se veprimet e FSHV-së janë të pabazuara ligjërisht dhe tejkalojnë kompetencat e Bordit të saj. Sipas klubit, këto veprime janë marrë në shkelje të procedurave dhe nuk ofrojnë garanci për konfidencialitet dhe privatësi. Klubi argumenton se ato cënojnë dinjitetin dhe integritetin e sportistes dhe të vetë klubit, duke legjitimuar një praktikë të papranueshme për verifikim gjinor bazuar në thashetheme. Gjithashtu, veprimet e FSHV-së nxisin gjuhën e përjashtimit dhe urrejtjes në sport.
Dinamo kërkon një reflektim nga ana e FSHV-së dhe thekson rëndësinë që çdo veprim të jetë në përputhje me standardet ndërkombëtare dhe të drejtat e sportistëve. Klubi distancohet nga çdo sjellje jo-etike dhe vlerëson çdo zë publik që mbështet mbrojtjen e të drejtave dhe dinjitetit të sportistëve në Shqipëri.
Në përfundim, Dinamo shpreh besimin se FSHV do të veprojë me transparencë dhe përgjegjësi në trajtimin e këtij rasti, duke respektuar standardet ndërkombëtare të sportit dhe të drejtat e sportistes.
