Autoriteti Kombëtar i Ushqimit (AKU) ka njoftuar se janë konstatuar nivele të tejkaluara të mbetjeve të pesticideve në dy produkte të importuara nga Greqia: pjeshkë dhe rrush të kuq francez. Të dy këto produkte janë klasifikuar si me rrezik për shëndetin e njeriut dhe situata është raportuar menjëherë në sistemin evropian të sigurisë ushqimore, RASFF.
Gjatë kontrolleve zyrtare, pjeshkat e importuara nga Greqia janë gjetur me mbetje të pesticidit Phosmet, që tejkalon normat e lejuara. Pas kësaj, operatori i biznesit ushqimor është urdhëruar të njoftojë të gjitha subjektet ku është shpërndarë produkti dhe, nëse është ende në gjendje, të organizojë kthimin e tij.
Një rast tjetër shqetësues është edhe ai i rrushit të kuq francez, i importuar gjithashtu nga Greqia. Ky produkt është analizuar dhe është zbuluar se përmban pesticidin Propamocarb në nivele mbi normat e lejuara. Inspektorët e AKU kanë gjetur një sasi prej rreth 800 kg të këtij rrushi në një pikë shpërndarjeje në Lezhë. Si masë parandaluese, AKU ka bllokuar këtë sasi në treg dhe ka nisur procedurat për asgjësimin e saj. Po ashtu, ky rast është raportuar në sistemin RASFF për t’u ndjekur më tej.
Veprimet e ndërmarra nga AKU shpresojnë të sigurojnë mbrojtjen e konsumatorëve nga produkte të dëmshme, duke pasur parasysh rrezikun e mbetjeve të pesticideve për shëndetin publik. Autoritetet iu bëjnë thirrje bizneseve dhe konsumatorëve për të qënë të kujdesshëm me produktet ushqimore, sidomos ato të importuara, për të parandaluar problemet e mundshme shëndetësore. Kjo situatë nënvizon rëndësinë e kontrolleve të rregullta dhe të imtësishme për sigurimin e cilësisë dhe sigurisë së ushqimit që konsumojmë.
