Trajneri i Chelseat, Enzo Maresca, ka bërë të ditur se lojtarët e tij kanë vendosur të gjobisin njëri-tjetrin për të ndaluar numrin e lartë të kartonëve të kuq që po ndëshkojnë skuadrën këtë sezon. Chelsea ka marrë tre kartonë të kuq në Premier League, si dhe pesë në të gjitha kompeticionet, përfshirë një për Maresca vetë. Kjo përbën gjysmën e rekordit të historik të skuadrës, që daton në edicionin 2007/08, kur morën 6 kartonë të kuq në kampionat dhe 8 gjithsej.
Nëse vazhdojnë me këtë ritëm, Chelsea mund të përfundojë sezonin me 14 kartonë të kuq, duke thyer rekordin aktual të Premier League që mbahet nga Sunderland dhe QPR, të cilët kanë arritur nga 9 kartonë të kuq në një sezon. Megjithatë, Maresca mohon se ekipi ka një problem disipline. Ai thekson se preferon një qasje edukative ndaj lojtarëve, duke i trajtuar ata si fëmijët e tij.
“I kam katër fëmijë – kur bëjnë diçka gabim, nuk i ndëshkoj. Mundohem t’i mësoj të bëjnë gjënë e duhur. Kështu veproj dhe me lojtarët,” tha ai para ndeshjes me Ajax. Maresca përmendi raste të fundit, si kartoni i kuq i Malo Gusto ndaj Nottingham Forest dhe ai i Trevoh Chalobah ndaj Manchester United, duke theksuar se të dy mund të ishin shmangur.
Sipas Marescas, vetë lojtarët kanë vendosur një sistem gjobash mes tyre për të ndëshkuar sjelljet që dëmtojnë ekipin në fushë. “Kur merr pesë apo gjashtë kartonë të kuq, diçka duhet përmirësuar. Kjo është diçka që ne do ta përmirësojmë,” deklaroi ai.
Pas përballjes me Ajax, Chelsea do të ndeshet me Sunderland, një nga skuadrat që mbajnë rekordin negativ të kartonëve të kuq që kjo skuadër rrezikon ta thyejë këtë sezon, një detaj që nuk do t’i shpëtojë vëmendjes së tifozëve dhe mediave.
