Një përplasje e ashpër diplomatike ka shpërthyer mes Izraelit dhe Francës pas deklaratave të presidentit Emmanuel Macron në mbështetje të krijimit të një shteti palestinez. Kryeministri izraelit Benjamin Netanyahu e cilësoi këtë qëndrim si një “gabim serioz” dhe sulmoi hapur presidentin francez.
“Presidenti Macron po bën një gabim të rëndë duke promovuar idenë e një shteti palestinez në zemër të tokës sonë, një shtet aspirata e të cilit është shkatërrimi i Izraelit,” shkroi Netanyahu në platformën X.
Përplasja u nxit më tej edhe nga djali i kryeministrit, Yair Netanyahu, i cili postoi një koment fyes ndaj Macron. Benjamin Netanyahu u distancua nga toni i djalit të tij, por theksoi se ai ka të drejtën për një mendim personal.
Në reagimin e tij, Netanyahu shtoi:
“Ne nuk do të rrezikojmë ekzistencën tonë për shkak të iluzioneve që nuk pasqyrojnë realitetin. Dhe nuk do të pranojmë predikime morale për krijimin e një shteti palestinez nga ata që kundërshtojnë pavarësinë e territoreve si Korsika, Kaledonia e Re apo Guineja Franceze, të cilat nuk përbëjnë kërcënim për ekzistencën e Francës.”
Macron, në një intervistë të fundit, kishte deklaruar se Franca mund të ndërmarrë hapat drejt njohjes së një shteti palestinez në qershor gjatë një konference në OKB. Ai shpreson që një hap i tillë të çojë në njohje reciproke të Izraelit nga vendet arabe.
Pas reagimeve të forta në Francë, Macron sqaroi qëndrimin e tij në një postim:
“Mbështes të drejtën legjitime të palestinezëve për një shtet dhe për paqe, ashtu siç mbështes të drejtën e izraelitëve për të jetuar në siguri. Po punojmë me partnerët tanë për një zgjidhje paqësore.”
Franca ka mbrojtur zgjidhjen me dy shtete për dekada, por një njohje zyrtare e shtetit palestinez nga Parisi do të ishte një ndryshim historik në politikën e saj dhe një sinjal i fortë ndaj Izraelit. Hamasi e përshëndeti deklaratën e Macron.
Aktualisht, gati 150 vende e kanë njohur shtetin palestinez. Vitin e kaluar, Irlanda, Norvegjia dhe Spanja e ndërmorën këtë hap, ndërsa Sllovenia ndoqi shembullin në qershor, një reagim ndaj bombardimeve të Izraelit në Gaza pas sulmeve të 7 tetorit nga Hamasi, një organizatë e shpallur terroriste nga SHBA, BE dhe vetë Izraeli.
