Situata hidrometeorologjike në qarkun e Fierit ka treguar përmirësime, me ulje të niveleve të lumenjve dhe funksionim normal të infrastrukturës. Sidoqoftë, 80 familje janë prekur nga përmbytjet, ku katër prej tyre në fshatin Cerven dhe rreth 75 në Ferras. Deri tani, 8 familje janë evakuar, prej të cilave 7 me 18 persona në Ferras dhe 1 me 2 persona në Poçem, Mallakastër.
Aksesi në akset rrugore nacionale dhe lokale është normal, pa pengesa në qarkullim. Furnizimi me energji elektrike vazhdon pa ndërprerje, ndërsa hidrovoret janë në gatishmëri të plotë. Deri më sot, s’ka pasur raporte për dëmtime në argjinatura, akse rrugore, apo infrastrukturë kritike.
Megjithatë, qyteti i Fierit po përballet me vështirësi në furnizimin me ujë të pijshëm, për shkak se Stacioni i Pompimit në Kafaraj është nën ujë nga lumi Vjosë. Ujësjellësi ka nisur shpërndarjen e ujit me autobotë për banorët e prekur.
Sipas të dhënave zyrtare, nivelet e lumenjve Seman dhe Shkumbin janë në rënie, ndërsa prurjet e lumit Vjosë në Urën e Mifolit po ulin. Kjo jep shpresa për stabilizimin e situatës. Pavarësisht kësaj, dalja e lumit Vjosë nga shtrati ka përmbytur rreth 650–700 hektarë tokë bujqësore, sidomos në zonat e fshatrave Poçem, Rromes, Varibop, Adë, Kashisht, Kafaraj, Cerven, Ferras, Qarrë, Martinë dhe Pishë-Poro.
Në bashkitë Lushnjë, Divjakë, Patos dhe Roskovec, ka pasur ujë të sipërfaqes në tokat bujqësore, por situata është duke u përmirësuar, me ujërat duke u tërhequr. Strukturat vendore dhe qendrore vazhdojnë monitorimin e situatës dhe punën për normalizimin e saj të plotë.
