Të paktën 31 të burgosur janë raportuar të vdekur në burgun El Oro të Machala, Ekuador, pas përleshjeve mes bandave rivale. Ndër këta, 27 të burgosur janë gjetur të varur. Incidenti ndodhi gjatë një shpërthimi dhune që rezultoi gjithashtu në plagosjen e dhjetëra të tjerëve.
Sipas shërbimit të burgjeve të Ekuadorit, rojet e sigurisë gjetën disa të burgosur të varur në katin e tretë pas përleshjeve. Burgjet e mbipopulluara në vend kanë qenë prej vitesh skena të dhunshme mes grupeve kriminale, duke rezultuar në humbjen e jetëve të qindra të dënuarve. Autoritetet thonë se arsyet për përleshjet e fundit kishin të bënin me planet për zhvendosjen e disa të burgosurve në një institucion të ri të sigurisë së lartë.
Burgun El Oro ka pasur histori të ngjashme dhune, ku në një incident tjetër në shtator, 13 të burgosur dhe një roje u vranë. Të afërmit e të burgosurve po i bëjnë thirrje qeverisë për të rritur masat e sigurisë dhe për të mbajtur të ndara bandat rivale. Ndërkohë, banorët e qytetit Machala kërkojnë zhvendosjen e burgut nga zona qendrore.
Më herët këtë vit, administrata e presidentit Daniel Noboa njoftoi ndërtimin e një burgu të ri të sigurisë maksimale në provincën Santa Elena. Ky institucion, i quajtur El Encuentro, pritet të hapet në fund të nëntorit dhe do të jetë i pajisur me teknologjinë më të avancuar të sigurisë.
Bandat e burgjeve janë identifikuar si një faktor kyç në rritjen e krimit të dhunshëm në Ekuador. Dy prej grupeve më të njohura, Los Lobos dhe Los Choneros, u shpallën si “Organizata të Huaja Terroriste” nga Departamenti i Shtetit i SHBA-së më së fundi në shtator, duke e theksuar edhe më shumë shqetësimin për ndikimin e tyre në sigurinë publike.
