KOSOVË- Kryetari i Kuvendit Dimal Basha, ka zhvilluar sot një takim konsultativ me Presidenten e vendit, Vjosa Osmani. Ky takim u mbajt në kuadër të bashkëpunimit institucional dhe koordinimit ndërmjet dy krerëve të institucioneve më të larta të vendit.
Detajet rreth përmbajtjes së diskutimeve nuk janë bërë të ditura, por takimi cilësohet si pjesë e përgatitjeve për proceset e ardhshme parlamentare dhe politike në vend.
“Sot, Kryetari i Kuvendit të Republikës së Kosovës, z. Dimal Basha, ka zhvilluar takim konsultativ dhe njoftues me Presidenten e Republikës së Kosovës, znj. Vjosa Osmani”, thuhet në njoftim.
Siç raportohet Basha ka thirrur për sot në orën 13:00 mbledhjen e kryesisë së legjislativit të ri, ndonëse ky i fundit nuk është konstituuar plotësisht pasi nuk është zgjedhur edhe një anëtar i kryesisë nga radhët e komunitetit serb.
Partia Demokratike e Kosovës dhe Lidhja Demokratike e Kosovës kanë paralajmëruar nuk do të marrin pjesë në mbledhjen e thirrur nga Basha, pasi sipas tyre ajo është antikushtetuese.
Pas disa muajsh seancash të dështuara për zgjedhjen e kryeparlamentarit, kriza politike në Kosovë mori fund. Gjatë procesit të votimit, Dimal Basha arriti të sigurojë 73 vota për, 30 kundër dhe tri abstenime. Në votat pro ishin dhe votat nga Partia Demokratike e Kosovës. Zgjedhja e Bashës kryeparlamentar i hap rrugën konstituimit të Kuvendit dhe formimit të Qeverisë së re, pas një ngërçi të gjatë politik, pas zgjedhjeve të 9 shkurtit.
