SHBA- Hunter Biden ka reaguar me zemërim ndaj aktorit George Clooney për vënien në dyshim të mprehtësisë mendore të babait të tij gjatë garës zgjedhore të vitit 2024, një ndërhyrje që çoi në tërheqjen e Joe Biden nga kandidimi për president.
Pasi u takua me Bidenin në një aktivitet për mbledhje fondesh në Los Angeles verën e kaluar, Clooney u bë një nga figurat e para të mëdha demokrate që i bëri thirrje Joe Bidenit të tërhiqej nga gara. Më pak se dy javë më vonë, ish-presidenti Biden njoftoi se do të tërhiqej për kandidaten e ardhshme demokrate, zëvendëspresidenten Kamala Harris.
Clooney u përfshi në fushatën presidenciale nëpërmjet një artikulli opinioni në New York Times në korrik 2024 me titull ” E dua Joe Biden. Por na duhet një kandidat i ri”. Aktori shprehu mbështetje për axhendën e presidentit, por vuri në dukje shqetësimet për debatin katastrofik kundër Trump, në të cilin ai pati një performancë të dobët në krahasim me rivalin e tij.
Në intervistë, Hunter Biden ia hodhi fajin për paraqitjen e dobët të babait të tij një axhende të ngjeshur udhëtimesh dhe marrjes së ilaçit Ambien, i njohur edhe si zolpidem, i cili përdoret për të trajtuar problemet e gjumit.
“I japin Ambien që të flejë. Ai ngjitet në skenë dhe duket si i fjetur”, tha ai, shkruan BBC.
Në artikullin e New York Times, Clooney tha se takimi me Bidenin në eventin bamirës tregoi se ai ishte i njëjti njeri që u pa në debat. Më shumë detaje rreth takimit në mbledhjen e fondeve u zbuluan në një libër të kohëve të fundit nga gazetarët Jake Tapper dhe Alex Thompson, të cilët raportuan se presidenti dukej shumë i dobësuar dhe se nuk e njohu aktorin.
Gjatë intervistës së publikuar të hënën, komentet e para të zgjatura të Hunter Biden që nga zgjedhjet e nëntorit të kaluar, djali i ish-presidentit e mohoi këtë rrëfim dhe tha se Clooney ishte “përpjekur t’i priste gjunjët një presidenti në detyrë”.
Hunter Biden kritikoi gjithashtu raportet e Tapper dhe të tjerëve se ai ishte i përfshirë shumë në takimet e Shtëpisë së Bardhë gjatë muajve të fundit të babait të tij në detyrë, edhe pasi u dënua për akuza për armëmbajtje pa leje.
“Mendoj se kam kaluar 12 ditë në Shtëpinë e Bardhë në dy vitet e fundit të administratës”, tha Hunter Biden. Përpara se të largohej nga detyra, Joe Biden e fali të birin, i cili vitin e kaluar u deklarua fajtor për evazion fiskal, përveç dënimit për akuzat për armëmbajtje pa leje. Marrëveshjet e biznesit të Hunter Bidenit, problemet ligjore dhe varësia ndaj alkoolit dhe drogës u bënë problem gjatë fushatës presidenciale të vitit 2020, kur përmbajtja e një laptopi që ai zotëronte u zbulua në gazetën New York Post.
Pavarësisht pyetjeve fillestare në lidhje me vërtetësinë e tij, materiali i rrjedhur u përcaktua si autentik, megjithatë pasojat nuk e penguan Joe Biden të mposhtte Donald Trump në zgjedhjet e atij viti.
Në fillim të këtij viti në intervistën e tij të parë që nga largimi nga detyra, Joe Biden tha se nuk pendohej që i dha fund fushatës së tij për rizgjedhje, por hodhi poshtë idenë se largimi më herët mund të kishte ndryshuar rezultatin. Një njoftim nga Joe Biden në maj të këtij viti se ai ishte diagnostikuar me kancer të prostatës ringjalli pyetje në lidhje me shëndetin e tij gjatë shërbimit në Shtëpinë e Bardhë.
