TIRANA- Presidenti i Partisë së Lirisë, Ilir Meta në mbledhjen e Kryesisë së kësaj partie tha se detyra e tyre është të vazhdojnë me riorganizimin e forcës politike dhe me fuqizimin e goditjes opozitare ndaj qeverisë. Ai shtoi se qëllimi duhet të jetë që të bashkojnë shqiptarët. Sipas Metës, kjo duhet bërë për t’i dhënë fund regjimit që ka synim shpopullimin dhe falimentimin e vendit.
“Është detyra jonë të vazhdojmë me këmbëngulje riorganizimin e partisë, të fuqizojmë goditjen opozitare ndaj kësaj narkoqeverie, të mbrojmë interesin kombëtar dje të bashkojmë të gjithë shqiptarët e ndershëm për t’i dhënë fund regjimit që ka program shpopullimin e Shqipërisë, falimentimin e vendit dhe shitjen e interesave kombëtare për pasurimin e Edi Ramës që është marrë peng dhe një grupi rreth tij, si dhe mbretërimin në këtë vend të mafias”, tha Meta.
Ndërkohë lidhur me protestën e banorëve të zonës pranë aksit Thumanë-Kashar, Meta tha se mbështet kërkesat e banorëve për shkak se, sipas tij, kjo rrugë e florinjtë nga një mundësi zhvillimi po shndërrohet në një instrument zhvatjeje dhe falimentimi për bizneset e ndershme në zonë. Ai shtoi se dënon me forcë keqpërdorimin e strukturave të Policisë së Shtetit, si një mjet represioni ndaj qytetarëve.
“Mbështes kërkesat e drejtave të banorëve të Krujës dhe Fushë-Krujës që po protestojnë sot në aksin Thumanë-Kashar për shkak se kjo rrugë e florinjtë nga një mundësi zhvillimi po shndërrohet në një instrument zhvatjeje dhe falimentimi për bizneset e ndershme në zonë.
Dhuna shproporcionale e banditeve të Policisë së Shtetit dhe më rëndë akoma përdorimi i lëndëve kimike janë dëshmi së e vetmja rrugë që po ndjek Narkoqeveria nuk është dëgjimi i halleve të qytetarëve dhe as zgjidhja e problemeve të tyre por shurdhëria dhe imponimi me dhunë i vendimeve arbitrare në kurriz të tyre.
Dënoj me forcë keqpërdorimin kriminal të strukturave të Policisë së Shtetit, si një mjet represioni ndaj qytetarëve, që për fat të keq po kthehet në normë në regjimin autoritar të Edi Ramës, pasi të njëjtat pamje dhune ne i shohim tani në mbarë vendin, kudo ku qytetarët ngrihen në protesta demokratike për të drejtat e tyre, siç e pamë në rastin e protestës së fermerëve duarartë të Maliqit e Korçës”, tha Meta.
