Të paktën 10 persona kanë mbetur të vrarë pas një sulmi me armë në Fakultetin e Filozofisë në Pragë. I vdekur ka mbetur edhe personi që hapi zjarr, pasi u neutralizua nga policia.
Autoritetet në vend bëjnë të ditur se nëntë persona të tjerë kanë mbetur të plagosur rëndë, kurse disa të tjerë kanë marrë lëndime të lehta. Në total, numri i të plagosurve dyshohet të jetë 25, por shifrat pritet të ndryshojnë.
“Po largohesha në drejtim të rrugës dhe papritmas dëgjova të shtëna”, thotë një nga dëshmitarët për sulmin në universitet në sheshin Jan Palach. Të tjerë përshkruan se si policët me automatikë i këshilluan ata të fshiheshin. Studentët e tjerë i shpëtuan për pak gjuajtësit.
“Unë zbrita. Takova një mik atje dhe papritmas erdhi policia. Po largohesha në drejtim të rrugës dhe më pas dëgjova të shtëna”, tha një nga dëshmitarët për një media çeke. Një nga oficerët u tha dëshmitarëve të fshiheshin.
“Unë nuk pashë asgjë, por shoku im ishte ulur në tramvaj dhe pa njerëz në çatinë e Fakultetit të Arteve dhe aty fshiheshin”, shtoi ai.
“Na evakuuan të gjithëve, ishte shumë e frikshme, kudo kishte policë me automatikë. Ata na bërtitën të vrapojmë jashtë”, e përshkroi studentja Klára përvojën e tmerrshme.
“Ishim në katin e katërt dhe sapo ikëm prej tij”, u shkruan njëra prej studentëve miqve të saj. “Për pak na qëlloi. Kam frikë se aty kanë mbetur edhe vajza të vitit të dytë”, u përgjigj një tjetër.
“Jemi në katin e tretë, ku ka qëlluar më pas. U fshehëm fort. Më pas ka qëlluar në korridorin afër klasës dhe aty dikush bërtiti”, ka përshkruar një tjetër nga nxënësit.
