Ka filluar shpërndarja e bonusit të fundvitit për 756 mijë pensionistë në Shqipëri. Pagesat do të realizohen sipas datës për çdo pensionist dhe shuma varion nga 10 mijë deri në 15 mijë lekë të reja. Ministrja e Ekonomisë dhe Inovacionit, Delina Ibrahimaj, njoftoi për fillimin e kësaj shpërndarjeje përmes një postimi në rrjetet sociale.
Sipas ministreshës, pensionistët me pensione deri në 20,000 lekë do të përfitojnë 15,000 lekë, ndërsa ata me pensione mbi këtë shifër do të marrin 10,000 lekë. Shpërblimi do të mund të tërhiqet nga 1 dhjetori 2025 deri më 30 qershor 2026.
Ibrahimaj theksoi se nga ky program do të përfitojnë gjithsej 762,740 pensionistë dhe përfitues të tjerë. Ndër ta, 640,325 janë pensionistë në pension pleqërie, 2,322 në pension social, 65,232 në pension invaliditeti, 48,087 në pension familjar, si dhe 6,774 persona që marrin trajtim të veçantë financiar, përfshirë minatorë të nëntokës dhe ushtarakë.
Pagesat për këtë bonus do të zhvillohen gjatë tërë muajit dhjetor 2025, me mundësinë e tërheqjes deri në fund të qershorit 2026 për ata që nuk e kanë bërë gjatë dhjetorit. Kjo masë është një mbështetje financiare për pensionistët gjatë periudhës festive të fundvitit, duke synuar lehtësimin e situatës së tyre ekonomike.
